Sambandsflokkurin, Javnaðarflokkurin, Miðflokkurin og Tjóðveldi løgd fram sínar valskráir fyrr í vikuni, og í gjár var tað Fólkaflokkurin.
Okkurt stendur eftir: Sambandsflokkurin vil hava fleiri pengar úr Danmark. Hann vil prísdalsviðgera blokkin – og rokna hetta aftur soleiðis, at vit við afturvirkandi kraft fáa endurgoldið einar 150-200 milliónir, sum vit hava mist, síðani løgtingið gjørdi av, at blokkurin ikki skuldi prístalsviðgerast.
Tjóðveldisflokkurin tosar um at fáa ferð á Føroyar. Tey tosa um »okkara land og okkara ábyrgd«, og at eingin annar skal skapa loysnirnar fyri okkum. Vit skulu skifta kós og taka ábyrgd – og so vil Tjóðveldi hava 55.000 fólk í Føroyum í 2020.
Javnaðarflokkurin tosar um eina skattaumlegging. Flokkurin hevur – sum tann einasti higartil – lagt fram eina ætlan um, hvussu hann ætlar sær at broyta skattingina soleiðis, at lág- og miðalinntøkur sleppa lættari, meðan vinnan eins og til dømis útisiglarar skulu skattast harðari.
Í gjár kom so Fólkaflokkurin við sínum. Tey vilja eisini hava skattin niður, og tey vilja eisini breiðka skattagrundarlagið eins og Javnaðarflokkurin – at fáa meira skatt frá teimum, sum arbeiða úti í heimi. Men tað verður ikki við at taka frádráttin frá føroyskum sjófólkum, men við at samráðast um at broyta dupultskattaavtalur við onnur lond soleiðis, at Føroyar fáa meira av skattinum, meðan hini londini fáa minni.
Fólkaflokkurin heldur, at vit skulu hava eina flatskattaskipan, har eingin skal gjalda meira enn 40 prosent í skatti. Flokkurin heldur eisini, at vit skulu rationalisera í almenna geiranum, vit skulu útveita og leggja stovnar saman – alt hetta, sum tilsamans sambært Fólkaflokkinum er at vaksa til javnvág.
Tað er gott, at politisku flokkarnir taka seg saman og skera út í papp sín politikk. Men orsøkin til, at hetta blívur so flosklakent er kanska, at als einki samanhang er í tí, sum flokkarnir føra fram. Vit vita, at minst tríggir flokkar fara at samstarva aftan á valið. Men vit hava ikki ánilsi fyri hvørjir.
Allir flokkar hava sitið við ábrygd, men tað tykist sum um flokkarnir vilja billa okkum inn, at teir júst eru komnir inn á politiska pallin – og tí royna at fyrigykla okkum sínar bæriligu ætlanir.
Tað sum hevði skapt respekt var, um flokkar gingu saman og greitt søgdu, hvønn veg tey vilja fara, so veljarin veruliga hevur eitt val valdagin.
