Sum kunnugt samtykti løgtingið fríggjadagin at niðurleggja Landsbanka Føroya. Páskotið hjá landsstýrissamgonguni er, at endamálið er sparingar, og at tey vilja reka samfelagið bíligari.
At hetta er ein sannleiki við modifikatiónum er øllum prúa greitt. Sjálvandi verður ein stovnur sum Landsbanki Føroya ikki niðurlagdur fyri at spara fimm milliónir krónur. Var tað endamálið, so hevði uttan iva borið til at funnið hesar fimm milliónir á annan hátt.
Men tað er greitt, at tann flokkur, sum ræður í glashúsinum á Argjum – og sum eisini hevur takið á løgmanni og øllum fylgi hansara, ikki er glaður fyri hendan stovnin. Kanka eitt sindur løgið, tá tað júst var Fólkaflokkurin, sum í sínari tíð vildi hava hendan stovnin. tað var jú Thorstein Petersen, ið sum tann fyrsti longur í fýratiárunum tosaði um føroyskan landsbanka. Tað var tá Fólkaflokkurin hevði visiónir um einar frælsar Føroyar við skipaðum búskaparviðurskiftum. Fólkaflokkurin var eisini partur av samgonguni, sum í 1978 bar lógina ígjøgnum tingið, og Jógvan Sundstein slóðaði eisini fyri, tá fyrsta innlánslógin varð samtykt í 1992. Men nýggi Fólkaflokkurin hevur saðlað um.
Nú skal Landsbankin klaskast undir ein almennan stovn, har habilitetskrøvini eru munandi lægri. Landsbankastjórin skal til dømis einki vinnuligt virksemi hava, meðan gjaldstovustjórin er rótaður upp í fleiri stór partafeløg og helst er meira løntur sum kapitalistur enn almennur stjóri.
Hetta boðar ikki frá góðum – og hetta fær okkum at hugsa um kiptu songfuglarnar enn einaferð. Songfuglar, sum javnan tosa um at fáa marknaðarmekanismurnar at virka frítt, og sum mæla til at reka politikin á eini sosial-limeralari kós.
Vit kunnu so bara vóna, at politikararnir ikki sleppa fram at fænum í Sambandsfasta, sum tó stórur vandi er fyri, og at tað ikki eydnast heldur at sleppa fram at fænum í Arbeiðsloysisgrunninum.
Andstøðan ger bart og lovar, at Landsbankin verður endurstovnaður, um flokkarnir fáa politiska ávirkan eftir næsta val. Tað er tað sjálvandi eingin sum veit. Men skal tað henda, so skal nógv broytast – og 12 tingsessir skulu blíva til 17, ella skulu atkvøðuneyt í øðrum flokkum skifta støðu. Í øllum førum er ein nýggjru landsbanki ivasamur, men livst so spyrtst.
