Vit hava nevnt tað fyrr, at fyrst valdi á tjóðveldislistanum í Havn – og Jógvan Skorheim í Klaksvík – heilt vist fóru at fáa í boði borgarstjórasess. Av somu orsøkum – gita vit – vilja fólk í slíkum støðum ikki framman undan valinum siga opið og erliga, hvønn meiriluta tey fara at stuðla.
Vit settu Jógvani Arge hendan spurningin uttan at fáa greitt svar. Jógvan Skorheim í Klaksvík fekk sama spurning. Hann segði bart út, at hann onga avtalu hevði við Gunvá við Keldu og Fólkaflokkin.
Soleiðis sum valúrslitið háttaði seg, so kundi Heðin Mortensen fara trygt heim at leggja seg, tí við reinum meiriluta var hann vísur í, at hann ongan knív fekk í ryggin.
Men úrslitið háttaði seg eisini soleiðis, at eingin av hinum flokkunum hevur ráð at halda hánt um Heðin Mortensen. Tí valdu eisini allir býráðslimir hann til borgarstjóra hóskvøldið.
Men tað er ikki bara Tjóðveldi, sum soleiðis satsaði skeivt við ikki at knýta seg at sínum samstarvsflokki fyri valið. Tað er ikki siður at gera soleiðis. At fólk stinga samstarvsfelagar í ryggin fyri maktina gongur sjón fyri søgn – eitt tað mest ítøkiliga dømið er á Eiði, har nýggi borgarstjórin hoppaði av listanum hjá sitandi borgarstjóra, tí hann bleiv freistaður – og sveik.
Hesin møguleiki var ikki aktuellur í Havn hesaferð, tí Heðin Mortensen hevur buktina og báðar endarnar. Tjóðveldisumboðini kunnu hava rætt í tí, at nevndirnar kundu verið skipaðar øðrvísi, tó at hetta nú mest tykist sum ein roynd at laga býráðsarbeiðið soleiðis, at pláss verður til Tjóðveldi og tess ávirkan. Hinvegin kundi verið spurt, um Sjúrður og Annfinn ikki eisini skulu hava okkurt.
Tað er eyðsæð, at tað mest politiskt-korrekta, sum Heðin Mortensen kann gera, er at knýta hinar flokkarnar at sær – nú teir so fegnir vilja. Tjóðveldi stendur helst fremst til varaborgarstjóran, Sjúrður Olsen kundi fingið onkran formanssess, kanska teknisku nevnd, og Annfinn Brekkstein ein fíggjarnevndarsess.
Tað verður ov strævið hjá Heðini Mortensen at stríðast við allar hinar flokkarnar. Ólíka lættari verður, tá øll eru í parti, nú hann kann fáa tey so bíliga. Ein dagur verður eisini, tá Heðin Mortensen ikki er í býráðnum longur, og tá fer flokkinum at tørva samstarvsflokkar.
