Lógin frá 1994 er nettupp ikki galdandi fyri partafeløg.
CEDAW nevndin hjá ST (nevndin móti kynsmismuni) vísti í seinastu frágreiðing síni á, at myndugleikarnir kunnu gera meira fyri at fremja javnstøðu í Føroyum – og nevndin mælir beinleiðis til at fremja kynsrættan í fyrisitingarligum og løgfrøðiligum arbeiði og seta fyribils kvotuskipanir í verk fyri at stimbra tilgongdina móti fullari javnstøðu. Og her vísir nevndin serliga á manglandi javnstøðuna á almenna og privata arbeiðsmarknaðinum.
Og júst hesa grundgeving vísa tey bæði til í uppskotinum – og tí vilja tey broyta javnstøðulógina, so hon eisini verður galdandi fyri partafeløg, sum tað almenna velur fólk í.
Soleiðis mælir hendan nevndin til at víðka kvotuskipanina, sum vit longu hava í lógini, til eisini at fevna um vinnuligt virksemi hjá tí almenna.
– Og hví ikki tað, kunnu vit spyrja. Hví skal javnstøðulógin ikki fevna um vinnuligt virksemi? Er tað tí, at politiski myndugleikin heldur, at so væl spælir klaverið kortini ikki: Gott nokk skulu vit lata kvinnurnar sleppa framat, men ikki tá tað snýr seg um vinnuligt virksemi, tí har vita menninir best?
Hetta er ein avoldaður hugsunarháttur, sum tíverri hevur fastatøkur nógva staðni í politisku skipanini. Men harfyri er hann ikki rættur. Okkara politiska skipan er eitt gott dømi um eina mansdomineraða skipan, sum lítið er at reypa av. Sama kunnu vit siga um okkara bankaskipan og aðrar skipanir, sum menn hava kollrent.
At krevja slíka skipan fyri privata vinnulívið er kanska at fara ov langt, tí hvussu privat fólk skipa seg í privatum nevndum, tað skal tað almenna ikki blanda seg uppí. Men tá ein tilvildarligur – og ofta ikki serliga kompetentur – landsstýrismaður skal manna vinnuliga nevnd við almennum umboðum, so er einki argument fyri at víkja undan javnstøðulógini. Embætis(manna)veldið megnar eins væl at finna skikkaða kvinnu sum mann.
Men trupulleikin er og verður hin sami: Har kvinnur skulu fáa vald, har skulu menn missa vald. Tað er tað, sum er so ringt. Og tað er tað, sum svíður so illa – hjá summum monnum. Men tað er tað, sum skal broytast til tess at fáa eitt rættvísari og demokratiskari samfelag allan vegin ígjøgnum.
