Tað fantastiska modellið var hetta sonevnda »OPP-modellið«, har privat feløg kunnu tjena sær hópin av pengum upp á almennar byggiætlanir.
Hetta er eitt modell, sum er nógv brúkt í Evropa, og sum Kári P. Højgaard og løgmaður ætlaðu eisini skuldi fíggja Skálafjarðatunnilsætlanina.
Vit hava fleiri ferðir á hesum stað víst á, at tað var »målet som helliger midlet...« í sambandi við allan skudin, sum løgmaður, Kári P. Højgaard og tingmenn á Skálafjørðinum høvdu við at fáa sáttmálan við CIP undirskrivaðan sum skjótast – og áðrenn løgtingið annars fekk umrátt seg.
Tað er bara at fara á Facebook-síðuna hjá løgmann, so síggja vit, hvussu hann hálovar ætlanini við privatu loysnini. Hann ger tað til ein spurning um persónligt frælsi at velja at »stuðal Magn ella Effo« ella »gjalda tunnilin«, sum hann sigur
– Gongur væl við íløguni fær landið tunnilin tað skjótari kvit og frit, gongur tað illa er í lagi hjá andstøðuni. Vit sleppa landinum undan váða og ovurstórum veðhaldi, nú sigi eg sum onkur, eg skilji spurningin men hvat er trupuleikin.
Nei lat okkum velja tað tryggaru loysnina við ongum almennum veðhaldi, og hvar tað persónliga frælsi kemur at avgerða, hvønn veg eg koyri, og hvat prís eg vil gjalda, sigur løgmaður eisini á Facebook.
Úti úr heimi hoyra vit eisini um ávaringar ímóti hesum OPP modellinum. Eitt nú hevur Konservativi flokkurin í Onglandi ávarað floksfelagarnar í Noreg, sum júst hava vunnið stjórnarvaldið, um ikki at nýta hetta modellið, so sum tey annars hava engt við í valstríðnum.
– Størsti váðin við OPP-avtalum er, at samlaðu útreiðslunar verða nógv hægri, enn tær høvdu verið, um talan var upp statsfígging, sigur flokkurin, sum vísir á dømi við einum sjúkrahúsi í Edinbourg, sum kostaði statinum 10,6 milliardir krónur, hóast tað bara var 1,8 milliardir krónur vert.
Pípan í Tinganesi hevur nú fingið annað ljóð. Tað sum Landsverk segði í vár, mettu løgmaður og Kári ikki verða vert at bera niðan í tíngið, tí tað órógvaði. Nú er tað grundarlagið undir støðutakanini hjá landsstýrinum. Tað er sjálvandi gott í sjálvum sær.
Men viðgerðartilgongdin í hesum máli er djúpt órógvandi.
