Landsstýrismaðurin nevndi, at skattatrýstið í Føroyum er hægri enn í til dømis Noreg, Íslandi og í Danmark.
Men skattaumleggingin skal kortini ikki kostað landskassanum pengar, sum flatskattaskipanin gjørdi, tá hon varð innførd nakrar dagar eftir, at borgarliga landsstýrið varð skipað.
Kringvarpið spældi eina gamla samrøðu við løgmann týsmorgunin, sum varð gjørd í fjør, tá fíggjarkarmarnir vórðu lagdir fram. Har tók løgmaður til sín kritikkin, sum samgongan hevur fingið fyri flatskattaskipanina, sum gav teimum ríkaru skattalætta.
Løgmaður segði, at samgongan eigur at taka hendan kritikkin til sín og vita, hvat gerast kann fyri at lætta um skattin á teimum lægru inntøkunum.
Tað eru 13 ár síðani, at hesi orðini hjá løgmanni fullu. Jørgen Niclasen segði við Rás2, at tey arbeiða við eini hugskotsskrá, har tey skulu finna hugskot fram til at vita, hvussu tey kunnu lækka skattin hjá serliga miðalinntøkunum.
So er spurningurin, hvat umleggingin gongur út uppá. Men tá flatskattaskipanin varð sett í verk var einki til hindurs fyri at frátaka landskassanum inntøkur í hundraðmilliónaklassanum, sum partvís varð fíggjað við at skatta pensjónirnar við inngjaldi.
Men eftir øllum at døma ætlar landsstýrið ikki at seta inntøkur til viks fyri at lætta um hjá teimum lágløntu. Og ger landið kortini tað við at seta í verk ymisk brúkaragjøld, so tey somu gjalda tað sama bara øðrvísi, hvussu nógv er tá vunnið?
Tað er spell, at vit ikki fingu ein generellan skattalætta, tá viljin varð so stórur, at landsstýrið kundi gjøgnumføra skattalættan hjá teimum háløntu upp á nakrar fáar dagar. Hevði viljin verið tann sami at lætt um hjá fólkum, við teimum lægru inntøkunum, so varð ikki bíðað til tólvta tíma, nú val stundar til, og flokkar eru farnir at fyrireika uppstillingarlistarnar.
Flatskatturin er uttan iva komin fyri at vera. Men skulu aftur 13 mánaðir ganga frá hugskoti til veruleika, so kunnu tey lágløntu skjóta ein hvítan píl eftir skattalættanum.
