Hóast tað ikki boðar frá greiðari javnstøðu á uppstillingarlistunum – tað er bara Framsókn, sum hevur tað – so munnu líkindini verða frægari enn nakrantíð til, at vit fáa eina rímuliga umboðan millum kynini, tí fleiri kvinnur liggja væl fyri í kappingini um sessirnar.
Men tað tykir eitt sindur løgið, at eingin politiskur flokkur megnar at fylla listan. Sambært lógini ber til at stilla upp 43 valevni. Teir flokkarnir, sum hava flest fólk á listunum, eru Tjóðveldi og Javnaðarflokkurin, sum hava 36 í part. Har eru sjey pláss eftir. Tá øll valevni fáa nakrar atkvøður, so er mangt sum bendir á, at fleiri atkvøður fara fyri skeytið, tí at listarnir ikki verða fyltir.
Siga vit at allir flokkarnir høvdu fullar listar, so vóru 301 valevni, 133 fleiri enn í dag.
Tað sum eisini eyðkennir listarnar er, at nógv valevni eru úr Suðurstreymi, har 71 av valevnunum búgva, meðan bert 24 koma av útoyggj, har landfast ikki er við meginøkið. Tað er eisini rætt, sum Dennis Holm, samfelagsfrøðingurin, segði í útvarpinum í gjár, at tað er ikki eins spennandi hjá fólki har at stilla upp, sum tað var fyrr. Tá landið var býtt í sjey valdømi, tá var tað eisini spennandi at verða næsti maður ella kvinna á listanum úti í valdømunum, tí fór eitt av tingfólkunum í til dømis Suðuroy í landsstýrið, so var tað næsta fólk á listanum í Suðuroy, sum tók sæti á tingi. Nú er tað næsta fólk á listanum kring landið.
Hetta gav at býta á seinasta løgtingsvali. Fýra menn úr Suðuroy vórðu valdir: Jóannes Eidesgaard, Jacob Vestergaard, Johan Dahl og Hergeir Nielsen. Tríggir teir fyrstu endaðu í landsstýrinum, og einki av varafólkum teirra í løgtinginum kom úr Suðuroy, so endin var, at Hergeir Nielsen varð einsamalli og einasti tingmaðurin úr Suðuroy.
Hinvegin kunnu vit so siga, at nú hava vit øll møguleika at velja politikarar úr øllum valdømum. Tað er rætt, at miðstaðarøkið hevur stóran týdning, men tað hevði tað eisini frammanundan, sum greiningin hjá Jóannes Hansen í vikuskiftisblaðnum eisini vísti: Tann flokkurin, sum vinnur valið í Havn, hann vinnur eisini valið í Føroyum. Í Havn eru so nógvar atkvøður at fara eftir, og tann flokkur, sum megnar tað, hann vinnur sum oftast løgtingsvalið.
