At kjakið er farið av sporinum hevur verið sjón fyri søgn leingi. Fleiri politikarar hava start seg blindar upp á málið, sum teir fyri alt í verðini vilja náa – líka mikið hvat.
Tá ein heil politisk skipan soleiðis missir fokus, so er viðgerðin heldur ikki nóg góð – og so er fólkaræðið í vanda. Bara tað at arbeitt verður við loyniligum avtalum, sum hvørki tingið ella almennigurin skal kenna til, vísir, at her er nakað rívandi galið.
Fyrrverandi formaðurin í Búskaparráðnum eftirlýsir eina grundleggjandi fakliga viðgerð av málinum. Hann vísir á útrokningar hjá Landsverki, sum vísir, at privata loysnin verður 40 prosent dýrari, enn um talan verður um eina almenna verkætlan.
Men hann vísiri eisini á, at við at dagføra útrokningarnar síggja vit, at munurin er øktur.
– Gjógvin millum almenna og privata leistin er snøgt sagt blivin breiðari og djúpari, soleiðis at privata loysnin nú er tríggjar ferðir dýrari enn almenna loysnin. Tað fer so at síggjast aftur í prísinum fyri at koyra í gjøgnum tunnilin, sigur Johnny í Grótinum.
Hann vísir á, at tá landsstýrið í juni seldi lánsbrøv fyri eina milliard blivu tey rivin burtur eftir einum tíma – og fasta rentan næstu fýra árini var 1,76 prosent, sum sigur okkum nakað um, hvussu tað almenna er fyri at læna pengar.
Eisini vísir Johnny í Grótinum á, at tað er sera óheppið, at bæði løgmaður og andstøðan blanda Sandoyartunnilin upp í hesa verkætlan, tí tað bara gruggar málið.
– Velur tú at seta prísin fyri at koyra gjøgnum Eysturoyartunnilin so høgt, at tær inntøkurnar kunnu fíggja ein Sandoyartunnil, so gerst samfelagsnyttan also minni. Og hinvegin sleppa politikarar tá undan at seta ítøkiligu, samfelagsbúskaparligu kost-nyttu útrokningina fyri Sandoyartunnilin greitt upp og raðfesta hesa íløgu í mun til allar aðrar íløgur á fíggjarlógunum næstu árini. Málið blívur tá ein spurningur um at røkka ávísum politikarum, sum kunnu koppa politiska meirilutan hendavegin ella hinvegin.
Og vit kunnu bara geva búskaparfrøðinginum rætt í, at hetta ikki er til fyrimuns, hvørki fyri samfelagsnyttuna ella fyri fólkaræði, sigur Johnny í Grótinum.
