Vit, sum reka privatar miðlar, sum bara eru fíggjaðir av tí, sum vit forvinna, gleða okkum til hendan sáttmálan, tí tá má tann himmalrópandi órættur, sum tað almenna fremur móti privatum fyritøkum steðgast. Tað er ikki rætt, at ein stovnur, sum krevur kringvarpsskatt frá fólki, eisini skal kunna kappast um handilslýsingar, sum verða bodnar út fyri undirprís. Hetta er so órættvís kapping, at Kappingarráðið átti at steðgað hesum, tá politikararnir ikki sjálvir klára tað.
Privatu miðlarnir vilja ikki hava almennan stuðul. Men um tað er eitt politiskt krav, at Kringvarpið bæði skal vera eitt public service kringvarp og eitt kommersielt kringvarp, so ber ikki til, at Kringvarpið samstundis einsamalt skal eiga kringvarpsskattin. So má hesin kringvarpsskattur lutast út millum hinar miðlarnar eisini.
Eins og so mong onnur vinnuvirki, so eru privatu fjølmiðlarnir eisini í tungum sjógvi í hesum tíðum. Fleiri bløð eru steðgað - og og fyrr í ár fór Føroya elsta blað, Dimmalætting, av knóranum, fyri síðani at verða loftað og uppkeypt av tveimum fyrrverandi reiðaríum saman við Føroya Banka, sum nú reka blaðið.
Í slíkum tíðum harðnar kappingin, og tann sterkasti klárar seg. Tað er eisini alt í lagi við tí, men so skal tað eisini verða á einum rættvísum grundarlag. Men her er tað, at Helena Dam á Neystabø hevur trupulleikar við Kringvarpi Føroya, sum ikki at merkja tey konjuktursveiggj, sum vit onnur í fakinum merkja. Men tað ger stovnurin, tí hann er kommersiellur. Stovnurin missir eisini trúvirði, tá hann má ganga upp á kompromis við journalistiska integriteti. Í fleiri førum verður lýsingatilfar smoygt inn í sendingar, eitt nú tá morgunsendingin má fortelja, hvat merki bilurin er, sum tey koyra í - og hvør bilasøla eigur hann, ella tá Kringvarpið selur lutaseðlar saman við privatum fyritøkum, sum sleppa í útvarpsstovuna afturfyri.
Slíkar tankar skulu vit ikki hava um Kringvarp Føroya. Vit eiga heldur at verða góð við Kringvarpið, tí hetta er ein so týdningarmikil mentanarstovnur. Tí skal politiski myndugleikin geva Kringvarpinum tær sømdir, sum stovnurin skal hava - og lata privatu miðlarnar um handilsliga partin. Tað er og verður so parturin hjá privatu miðlunum at tryggja, at journalistiski integriteturin verður hildin í hásæti.
