Tað segði brandingsserfrøðingurin, Simon Anholt, í Degi og Viku fyrr í vikuni. Simon Anholt hevur gjørt kanning fyri Uttanríkisráðið um, hvat skal branda Føroyar, og hvussu vit eiga at branda Føroyar.
Boðskapurin hjá honum var rættiliga greiður: Grindadrápið er øðrvísi, tí mong fólk hava tíverri áhuga fyri tí uttanlands - og tíverri er tað eisini einasta orsøk hjá fleiri til, at tey hava hoyrt um Føroyar, sigur hann.
Tað, sum kortini kann undra er, at hann í frágreiðing síni als ikki nevnir fótbóltin. Er tað so, at nógv fólk kenna okkum - og bara fyri tað ringa - vegna grindadrápið, so kann tað ikki passa, at ein slík kanning ikki hittir fólk, sum kenna okkum - fyri tað góða - gjøgnum fótbóltin. Eru vit uttanlands, og kanska langt av landi skotin, so hittir tú altíð onkran, sum tosar um føroyska fótbóltslandsliðið.
Men sambært kanningunum hjá Simon Anholt eru Føroyar eitt ókent land, og tað einasta fólk kenna, er grindadrápið. Orsøkina sigur hann vera spurningin um hótt djórasløg, og alt stríðið og orkuna, sum felagsskapir sum Greenpeace hava lagt í slíka mál í áratíggju til tess at fáa slík mál til verulig stríðsmál.
Simon Anholt segði eisini, at høvuðsorsøkin til at negativa brandingin við grindadrápinum er so sterk er, at grindadráp er ein góð søga hjá fjølmiðlum: Myndirnar eru so sterkar, har er nógv blóð, og tað merkir, at talan verður um eina høvuðssøgu, sum fær fólk at keypa bløð og hyggja í sjónvarp.
Hann heldur, at tað er av týdningi, at føroyingar hava virðing fyri negativu umtaluni og ta styrki, hon hevur og mælir føroyingum til sum móttrekk at koma við eini eins góðari søgu um grindadráp, sum fær fólk at fáa Føroyar høgt í metum. Men tað má ikki bara vera ein søga um, at Føroyar banna grindadrápi, tí tað er ikki nóg spennandi. Tað má gerast á ein spennandi og dramatiskan hátt, segði hann. Hvør hesin háttur er, meldar søgan einki um.
Men vit verða helst noydd at tálma grindadrápi kortini. Ikki av tí at fólk úti í heimi taka synd í hvalunum, men tí at maturin er eitraður. Tá vit ferð eftir ferð fáa læknalig tilmæli um ikki at eta grind, so má tað fyrr ella seinni enda við, at grindadrápið steðgar.
Tann dramatiska søgan kann so verða, at grindin hjá føroyingum er eitrað av londum, hvørs íbúgvar halda tað verða so synd at drepa hval - samstundis sum tey ikki himprast við at drepa fólk. Móður Danmark ein av tjóðunum, sum drepur fólk.
