Kaj Leo Holm Johannesen gjørdi tann 10. september í fjør greitt av løgtingsins røðarapalli, at Vágatunnilin og Norðoyatunnilin ikki eru endaliga niðurgoldnir fyrr enn bæði lán og íløgan hjá landinum upp á 395 milliónir krónur eru niðurgoldin.
Jørgen Niclasen, fíggjarmálaráðharri, sigur við Sosialin í dag, at tað kemur einki krav frá Fíggjarmálaráðnum um, at tað framvegis skal kosta at koyra gjøgnum undirsjóvartunlarnar, tá lánini eru útgoldin.
Men stjórin í tunlunum vísir til boðini frá løgmanni, sum eru, at tað verður ikki ókeypis at koyra, fyrr enn »útveganarkostnaðurin« er afturgonldin – og tað merkir, at vágafólk mugu brynja seg við toli í eini fýra til fimm ár afturat – og norðoyingar nakað longur.
Men tað eru ikki øll, sum finna seg í tí. Marjus Dam, fyrrverandi tingmaður fyri Sambandsflokkin, sum var við til at samtykkja lógirnar um undirsjóvartunlarnar, ger bart á Facebook og hóttir beinleiðis við at fara í kríggj:
– Vit gjalda ikki eina krónu eftir at tunnilin er niðurgoldin. Tað var ein avtala, og hon skal haldast.
Vit hava havt eitt Klaksvíksstríð. Tað sær út til, at Uni (stjóirn í tunnilsfeløgunum, red.) leggur upp til eitt slíkt bæði í Vágum og Klaksvík. Tí vit gjalda ikki bummpening til viðlíkahald. Viðlíkahald verður goldið gjøgnum skatt, vegskatt og skatt á bensi og diesel. Liðugt. Ella kríggj...
Vit skilja væl tey fólk, sum hava havt ta fatan, at tá lánini eru afturgoldin, so verður ókeypis at koyra. Og tá lánini í Vágatunlinum verður útgoldin í summar, so vænta tey sjálvandi, at tað longu í summar verður ókeypis at koyra.
Men tað verður tað ikki. Tað hevur løgmaður staðfest. Men koyrtini sigur fíggjarmálaráðharrin nakað annað. Vit skilja eisini, at Jørgen Niclasen kann vænta sær trupulleikar av at broyta givin lyfti.
Heldur enn at tosa hvør í sína ætt, so áttu landsins hægstu menn at melda greitt út til fólkið, hvat vendir upp og hvat vendir niður í hesum málið. Sum støðan er nú, so ganga tað fleiri á, til tað verður ókeypis at koyra í tunlunum.
