Grundgevingin hjá sandoyartingmanninum er púra greið: Hann skal hava ein tunnil til Sandoynna. Og so kann tað gera akkurát tað sama, hvat tað kostar. Hann er fyrst og fremst tingmaður fyri Sandoynna, meðan flokstilknýtið kemur í aðru røð.
Fyri nøkrum árum síðani fóru nýggir vindar at blæsa í føroyskum politikki. Meðan tað fyrr vóru fólk í flokkunum, sum í felag stríddust fyri felags hugsjón, so hava vit fingið politikarar, sum ofta bara hava áhuga fyri, at tað gongur teimum sjálvum persónliga væl. Sjálvprofileringin, sum ikki var kend á til dømis valplakatum fyri aldaskiftið, er fullkomiliga farin yvir gevind. Og síðani Føroyar gjørdust eitt valdømi er tað bara blivið verri.
Bara tað at fólk í Løgtinginum grína eftir, at Javnaðarflokkurin fór eftir einum nevndarlimi í Sandoyar sýslu Sambandsfelag, fyri at fáa tingmannin í oynni aftur, sigur sítt. Flokkarnir eru við til at upploysa seg sjálvar, tá tað eru persónarnir, sum fylla meira enn flokkurin og hugsjónirnar.
Og tað má koma til skarpskeringar nú. Aksel V. Johannesen kann ikki liva við, at Gerhard Lognberg atkvøður saman við samgonguni og harvið bjargar samgonguni. Tað sigur seg sjálvt, at einum so stórum misáliti kann ein floksformaður ikki liva við. Og tað kann Javnaðarflokkurin heldur ikki.
At yppa øksl og siga, at hatta er Gerhard, tað gongur ikki. Trýr Gerhard meira upp á ein Sandoyartunnil frá Kaj Leo enn frá sínum egna flokki, so er Gerhard Lognberg í skeivum flokki.
Og trýr Javnaðarflokkurin, at veljarin kann liva við – at flokkurin kanska kann liva við slíkum hugsjónarleysum politikki, so má hann trúgva umaftur.
Tveir møguleikar eru: Aksel V. Johannesen setur Gerhardi stólin fyri hurðina og krevur, at hann atkvøður við flokkinum, ella at Gerhard Lognberg fer.
At koyra víðari aftan á eitt so stórt misálit, sum Gerhard Lognberg leggur upp til, tað er tað sama sum at avtaka flokkin. Eingin kann hava álit á einum slíkum flokki – og tað er beinleiðis vandamikið at sleppa slíkum flokkum at valdinum.
