Men gongdin seinastu árini hevur verið eyðsýnd. Gomlu eigararnir hava ikki tillagað seg broyttar umstøður – og beinleiðis skeivar avgerðir, sum áttu at fingið avleiðing fyri nevnd og leiðslu fyri fleiri árum síðani førdu til, at gomlu eigararnir mistu alt, tá felagið misti allan partapeningin, sum fá ár frammanundan kundi verið seldur fyri í minsta lagi hálvthundrað milliónir krónur. Nýggi eigarin gjørdi ongar munagóðar broytingar, men helt fram í sama spori, og tí bar ikki til at sleppa undan húsaganginum.
Tað sigst, at tað var V. U. Hammershaimb sum á stovnandi fundi í 1877 skjeyt upp, at nýggja blaðið Amtstidende for Færøerne, skuldi hava vakra hjánavnið Dimmalætting – tí at fáa ein miðil, um enn tað varð ein miðil, sum vardi tað danska og stríddist ímóti tí føroyska, so var tað ein fólkaræðisligur sigur og eitt framstig so stórt, at samtíðin í dag hevur ilt við at fata tað.
Vit hava so mangan á hesum stað víst á ta stóru kappingaravlaging, sum privatu miðlarnir hava, tí at politikarar ikki hava rygg til at geva almenna kringvarpinum sømuligar umstøður, soleiðis at almenna skattafíggjaða public servicevarpið kundi sloppið undan at stríðst fyri lívinum við at brúka almennar pengar til at kvala privatu miðlarnar.
Men tað er ikki trupulleikin í sambandi við Dimmalætting. Føroya – í nógv ár – fremsti miðil er farin á húsagang vegna eina røð av skeivum leiðsluavgerðum. Tey siga sjálvi, at tann fyrsta skeiva avgerðin var uppkeyp av tveimum bløðum, sum øll í vinnuni áttu at vitað ikki kundu halda fram. Fyri tað næsta hevur leiðslan ikki tillagað útgávutíttleikan eins og at umstilla seg til talgildar miðlar.
At tað hevur kostað 50 milliónir krónur meira at givið Dimmalætting út enn Sosialin seinastu fáu árini er kanska nóg góð frágreðing.
Vit vóna, at Dimmalætting kann endurreisast. Men tað má verða á einum burðardyggum grundarlag.
