At løgreglan sendir átta salatføt higar kann væl saktans ikki tulkast øðrvísi enn, at tey vænta stríð. Eitt flogfar við donskum løgreglufólki kunnu tey altíð senda hendavegin í eini handavend – og tað sigur okkum, at onkur fyrireikar seg upp á harðari stríð enn nakrantíð um grindadráp.
Mest sum til stuttleika hava vit svarað nøkrum av teldupostunum – flestu koma úr Týsklandi. Vit hava greitt eitt sindur frá um grindadráp – og at vit í Føroyum í veruleikanum góvust við at drepa fólk í 1706, tá skælingssysktini sum tey síðstu vórðu hálshøgd. Og so er so lætt at venda skjútsinum.
Sjálvandi er tað eingin undanførsla fyri, at vit skulu framhaldandi sleppa at drepa grind. Men tað setur kortini tingini í perspektiv, tí tað hevur nakað við tað at gera, um eggið skal læra hønuna, ella øvugt.
Men her duga vit altso ov illa. Og serliga er tað landsstýrið, Løgmansskrivstovan ella Uttanríkisráðið, sum átti at fylt okkum øll við argumentum. Tað er ein veruleiki, at tað eru fáir føroyingar, sum eru førir fyri at svara evropunum aftur – og serliga at skula argumentera á týskum ella enskum, fyri ikki at tala um á fronskum.
Hví kann landsstýrið ikki læra av hesum sokallaðu umhvørvisfelagsskapunum, sum tá alt kemur til alt í fleiri førum eru felagsskapir, har einstaklingar hugna sær fyri onkran ríkamans pengar. Sum eitt nú Paul Watson ella Pete Bethune – ið við at nassa upp á sjálvhátíðarligar sjónleikarar – ríkmenn og -kvinnu kunnu fíggja sær eitt spennandi marglætislív á sjónum – sum nútíðarinnar sjórænarar við øvugtum fortekni, sum ein annar Robin Hood.
Slíkt er langt úti. Men heilt víst er tað, at nakrir føroyskir grindaformenn og grindamenn formáa sær lítið, tá tað kemur til skarpskeringar. So um sýslumenn bara lata standa til – og ikki fyrireika seg upp á ein steðg við grindadrápum, um hesi fólkini koma, so býður ikki bøtur.
Men harra løgmaður! Tú hevur evsta valdið. Fóðra tú landsins íbúgvar við góðum argumentum á ymsum málum – og tað alt fyri eitt! Legg tað á www.tinganes.fo – og latið so okkum øll spreiða tað á Facebook og øðrum sosialum miðlum.
Um 40.000 føroyingar senda 50 teldupostar, so náa vit 2.000.000 milliónum evroperarum. Tá talið av grindafanatikarunum uttan iva kortini er avmarkað, so hevði tað gjørt góðan mun.
