Tað er harmiligt, at tað hevur gingið so illa í hond at samskipa og menna ferðafólkavinnuna, so hon veruliga gjørdist eitt ískoyti til búskapin. Eyðvitað er, at eins og onnur smá oyggjasamfeløg kunnu vinna fitt upp á ferðavinnuna, so kunnu vit í Føroyum heilt vist fáa væl betur burturúr.
Tí er tað helst gott, at løgtingið hevur samtykt at endurstovna Ferðaráðið. Men tað má so ikki fáa somu lagnu, sum tað fyrra, og tí má eitt gott og virðiligt fyrireikingararbeiði gerast.
Tað er eitt kent fyribrigdi í Føroyum, at vit hava tað fyri at seta ov nógv smá kongaríki á stovn. Tað eru stovnar og ráð, sum altíð hava nóg mikið í sær sjálvum, sum altíð vita best – og hvørs tilverugrundarlag alt ov ofta tykist vera tað, at vera til – heldur enn hvat gagnar samfelagnum best. Tí krevur tað, at vit hava eina greiða stýring , og at alt samstarv og øll samvinna gongur upp í eina hægri eind.
Men skulu vit hava eina ferðavinnu, sum verður eitt veruligt ískoyti til búskapin, so krevur tað eisini, at flutningsleiðirnar til landið eru góðar og greiðar og bíligar. Landið eigur meirilutan í báðum flutningsfeløgunum, sum flyta ferðafólk, Atlantsflog og Smyril Line. Um tað er gott ella ringt, tað kundu vit altíð kjakast um, men tað er í øllum førum ein veruleiki, sum forpliktar.
Smyril Line hevur verið rikið á privatum grundarlag, hóast landið fleiri ferðir hevur loftað felagnum, tá húsagangur hevur hótt – og tað hevur ført við sær, at landsstýrið og landið gjøgnum grunnar eigur meirilutan í felagnum. Viðvíkjandi Atlantsflogi, so byrjaði landsstýrið eina privatiseringstilgongd, sum steðgaði í hálvum gekki við tí úrsliti, at landsstýrið í veruleikanum hevur snýtt privatu partaeigararnar, sum ikki hava gjørt annað enn at geva landskassanum eitt sera bíligt og rentufrítt lán.
Skulu vit hava eina burðardygga ferðavinnu, so krevur tað, at landið gevur vinnuni góðar og tryggar karmar. Lyfti hava verið um sertreytir fyri heimligu vinnuna við eitt nú lækkaðum meirvirðisgjaldi. Men hetta tykist ikki blíva annað enn orð. Eingin ivi er um, at talan er um vinnu, sum kann blóma.
Men tað krevur, at bestu karmar verða skaptir.
