Umframt hetta tal, so vitja yvir 50.000 cruise ferðafólk í Føroyum um árið, og hetta talið er vaksandi.
Spurningurin er so, um vit duga nóg væl at fáa pengar burtur úr hesi vinnu. Eyðvitað gera vit ikki tað.
Sambært Kunningarstovuni í Havn, so er áhugin at koma til Føroya við cruiseskipum vaksandi. Tey siga eisini, at cruisevinnan ofta verður undirmett sum inntøkukelda, tí fokus bara verður hildið á, hvat tey ferðandi keypa í handlum og sølustøðum.
Eitt miðal ferðamannaskip, sum hevur 1.000 ferðandi, verður mett at geva einar 300.000 krónur í inntøkum. Umframt handlar, matstovur og søvn eru cruiseskipini serliga ein inntøkukelda hjá havnum, agentum, bussum, ferðaleiðarum og øðrum.
So er spurningurin bara, um vit duga nóg væl at geva ferðafólkunum eina góða uppliving í Føroyum.
Seinastu árini hevur matstovuvinnan ment seg nógv. Stórur dentur verður lagdur í ta føroysku matmentanina, tær føroysku ráðvørurnar, sum skulu vera so serliga góðar – ikki minst við okkara serliga ræsta matmentan tykist vekja áhuga.
Í aðrar mátar kundu vit eisini gjørt meira burturúr við tiltøkum beinleiðis til ferðafólkið. Vit hava okkara serligu søgu, sum í mogun førum kann vera áhugaverd. Vit hava fleiri søgulig støð og bygningar, sum vit saktans kundu gjørt nógv meira burtur úr at víst fram – beinleiðis sum ein vinnuveg.
Helst eru øll samd um, at ferðavinnan kann mennast til at gerast eitt nógv betri íkast til samfelagsbúskapin. Men tað krevur so, at vit fáa enn fleiri fólk hendanvegin.
Her eru sjálvandi tær avmarkingar, sum eru, tá flutningsleiðirnar fyrst og fremst ganga umvegis Danmark.
Fyri tað um føroyingar ferðast ein ávísan veg út í verð, so er ikki vist, at fremmandu ferðafólkini ynskja at ferðast sama veg. Tí er tað áhugavert, um nú okkurt evropiskt flogfelag skuldi funnið upp á at setta eina nýggja flogrutu til Føroya úr onkrum landi í Evropa. Best er sjálvandi, um hetta var úr øðrum landi, enn Danmark, eitt nú Týsklandi, Hollandi ella Framklandi. Tað hevði skapt møguleikar, sum vit ikki hava í dag.
