Sambært úrslitinum, sum varð lagt fram í Mentamálaráðnum týsmorgunin, so eru Føroyar nummar 42 av 66 londum í støddfrøði, nummar 46 í lesing og nummar 48 í náttúruvísindi.
Hóast landsstýrismaðurin sigur seg fegnast um, at framgongd er at hóma, so er úrslitið alt annað enn nøktandi.
Formaðurin í lærarafelagnum vildi gera tað til, at spurningarnir vóru ikki nóg góðir – men legði tó dent á, at tað ikki skuldi nýtast til umbering. Men hann valdi kortini at nevna tað, so okkurt man hann leggja í tað.
Úr Mentamálaráðnum verður sagt, at ráðið beinanvegin saman við skúlaleiðarum fer at viðgera úrslitini og at umrøða møgulig átøk í skúlunum. Fundur verður longu í næstu viku. Eisini fer ráðið at heita á Fólkaskúlaráðið um at gera tilmæli í sambandi við nýggjastu PISA-úrslitini og at styrkja uppfylgingina og eftirmetingina av átøkunum, sum longu eru sett í verk.
Tað er mikið gott, at tikið verður í egnan barm líka úr Mentamálaráðnum og allan vegin niður gjøgnum skúlaskipanina. Men tað nyttar ikki at gera sum í fótbóltinum – at fegnast um framgongd hóast alt, tá vit eru so langt aftanfyri.
Tað er als ikki nøktandi, at vit liggja so niðarliga, tá vit vilja vera ein framkomin tjóð. Vit eiga at liggja nógv hægri, og tí eiga munagóð stig at verða tikin.
Vit kunnu altíð skylda upp á skúlan ella laggja lærarar undir at vera vánaligar. Men foreldur mugu eisini taka í egnan barm. Tí tað krevur nógv av einum heimi, at børnini fáa tað burtur úr skúlagongdini, sum teimum er ætlað. Tað krevur hart arbeiði hvønn einasta dag. Tað krevur eisini, at børnini duga at uppføra seg í skúlanum, og tað skal sjálvandi eisini lærast heimanífrá. Kanningar vísa, at lutvís stórur partur av tíðini hjá lærarum fer bara til at fáa arbeiðsfrið.
So ja, mentamálaráðharrin skal taka seg saman. Men tað skulu foreldur so sanniliga eisini, soleiðis at børnini koma væl fyrireikað í skúla.
Føroyska samfelagið kann ikki liva við, at okkara børn fáa botnkarakter.
