Vit minnast øll, hvussu gekst við teimum fyrstu fýra brunnunum. Hesir prógvaðu eina virkna kolvetnisskipan men so heldur ikki meira. Oljufeløgini mettu tí, at lítið og einki var at fara eftir í sokallaða "Gullhorninum" og hava tí í eina tíð arbeitt við eini ætlan at flyta restandi fýra brunnarnar longur inn á landgrunnin, har møgulig oljuløg eru fjald av tjúkkum basaltfláum. Av tí at tað er meira kostnaðarmikið at bora inni á basaltinum, og váðin tí eisini verður størri, hevur verið tingast um at leggja teir fýra brunnarnar saman til tveir.
Nú er so komið undir land við tí fyrstu verkætlanini og avgjørt er at flyta teir báðar brunnarnar, sum BP og Shell hava bundið seg til at bora frá einum seks ára loyvi og inn á eitt níggju ára loyvi, sum oljufelagið Anadarko stendur fyri. Alternativið til hesa ætlanini hevði møguliga verið als ikki at bora írestandi brunnarnar men heldur goldið landskassanum pengarnar fyri tað, sum hesir brunnar høvdu kostað. Tvs. einar 300 til 400 mill. kr. Tað hevði sjálvandi komið væl við hjá landskassanum, men tað hevði so ikki gagnað leitingini. Við nýggju avtaluni um at bora ein brunn í 2007 verður so hildið fram við oljuleitingini og hol verður sett á eitt heilt nýtt og ókent øki á Føroyaleiðini.
Slík avtala er avgjørt eitt stig rætta vegin. Tað er ein sigur fyri Føroyar, fyri oljufeløgini og fyri oljuleitingina. Tað heldur gongd í ella rættari, tað setir ferð á hesa leiting og kann koma at fáa stóran týdning fyri komandi leitivirksemi á øllum landgrunninum í næstu framtíð. Roynd verður nýggj arbeiðsmodell, borað verður gjøgnum basalt á fyrstan sinni og ljóskastarin verður settur á eitt nýtt øki á landgrunninum. At hetta eisini liggur nærri landi er eisini áhugavert. Eisini er tað skilagott, at tú við slíkari ætlan fær fleiri oljufeløg at samstarva um at bora.
Í kjalarvørrinum á hesi ætlan verður so eftir øllum at døma gjørd líknandi avtala um ikki so langa tíð, har tveir aðrir brunnar, sum vórðu ætlaðir at bora í Gullhorninum, nú verða fluttir og lagdir saman aðrastaðni inni á landgrunninum. Og aftur her er talan um basaltøki. Har verða tað ikki minni enn 8 feløg við í verkætlanini við Statoil á odda. Hesin brunnurin verður eftir øllum at døma longu boraður í 2006. Bæði oljufeløg og føroyskir oljumyndugleikar eiga rós uppiborið fyri, at tað hevur eydnast at seta út í kortið av nýggjum og at fáa sett av tveir brunnar inni á landgrunninum, har eingin hevur borað áður. Hesir kunnu vera lykilin til eina nýggja tíð og kunnu koma at geva okkum svarið uppá, hvat veruliga goymir seg undir basaltinum. Tað kann so aftur vera ein katalysator fyri nógv annað leitivirksemi á Føroyaleiðini. Men miseydnast hesar báðar verkætlaninar kann tað eisini gera, at oljuleiting við Føroyar fær ein ordiligan frammaná, soleiðis at áhugin hjá umrøddu 10 oljufeløgum og øðrum við minkar ella verður eingin. Men tann, sum einki váðar, einki vinnur.
Sosialurin
