Ein spurnarrunda, sum Sosialurin í gjár gjørdi millum tingfólk vísir, at ein stórur meiriluti av tingfólkunum halda, at tað er rætt, at tingfólk fara eini fimm prosent niður í løn soleiðis, at tey kunnu ganga sum góðar fyrimyndir, nú ætlan landsstýrisins er, at hægri løntu almennu starvsfólkini skulu niður í løn sum ein kompensatión fyri skattalættan.
Leiðarin á lønardeildini í Fíggjarmálaráðnum hevur sagt, at landsstýrið vil, at starvsfólk, sum fáa ein skattalætta, sum svarar til ein lønarvøkstur upp á átta prosent, skulu fýra prosent niður í løn.
Í september í fjør setti Sosialurin eisini tingfólkum sama spurning, tá málið eisini varð frammi. Tá søgdu tingfólk kortanei. So her er hend ein broyting, sum helst ikki bara skyldast, at partur av tingfólkunum eru skift út, men heldur tað, at landsstýrið hevur konkretar ætlanir um, at almenn starvsfólk skulu niður í løn. Tí kunnu tey ikki siga annað, enn at tey sjálv skulu ganga sum góðar fyrimyndir. Alt annað vildi verið hyklarí.
Hóast samlaða svarið frá tingfólkum er rímuliga greitt, so undar tað okkum, at summi tingfólk – sum fara at atkvøða fyri flatskatti, sum gevur teimum ríkaru skattalætta – ikki vilja svara einum so konkretum spurningi. Og tá ein ávísur tingmaður svarar, at hann tosar ikki við Sosialin, tí at Sosialurin hevur skrivað um ein dóm, hann júst hevur fingið fyri skattasvik, tá grevur hann seg so djúpt niður, at hann átti at lagt tingsessin frá sær beinanvegin. Slíkt er óvirðiligt, her átti formaðurin í tingbólkinum hjá Sambandsflokkinum, ella løgmaður sjálvur, at sett mannin upp á pláss.
Tað kann tykjast banalt, oppurtunistiskt og populistiskt at seta tingfólki slíkan spurning, samstundis sum fakfelagsfólk og onnur dukaðu á veggirnar í tinghúsinum fyri at mótmæla ætlaða flatskattinum. Men hinvegin eru politikararnir millum tey væl løntu almennu starvsfólkini, sum enntá hava tað previlegium, at tey sjálvi áseta sína egnu løn og sína egnu pensjón og sínar egnu skattafríu ágóðar, sum eru so vanvirðiliga langt oman fyri tað, sum vanlig fólk fáa.
At tingfólk siga ja til lønarniðurskurð forpliktar, samstundis sum tað vísir álvaran í málinum hjá samgonguni við at gjøgnumføra flatskattaskipanina og at kroysta fakfeløgini til status quo ella eina ávísa lønarlækking.
