Tann síðsti at taka málið upp var Edmund Joensen. Onkur roynir eisini at sleppa á ting við at meina tað sama. Men tá tú hevur sitið 23 ár á tingi, hevur verið Føroya Løgmaður og fólkatingsmaður, so átti tú at kunna komið við aðrari loysn á ferðaseðlaprísunum, enn at privatisera tær báðar farleiðirnar, vit hava eftir.
Atlantsflog er parvíst privatiserað, ein triðingur varð seldur privatum. Landsstýrið gav lyfti um, at ein triðingur afturat skuldi seljast. Men tað var ikki gjørt, hetta lyftið til partaeigararnar hevur landsstýrið svikið. Flokkurin hjá Edmundi Joensen ræður fyri borgum í Tinganesi, hann umsitur eisini Vinnumálaráðið, sum aftur umsitur landsins ognarlut í Atlantsflog. So nú er ikki at tosa, Edmund, men at handla!
Tað er at blása torvmold í eyguni á fólki at fyrigykla teimum, at tað verður bíligari at ferðast, fyri tað um Atlantsflog verður privatiserað. Tað kostar sjálvandi at hava eitt flogfelag flúgvandi. Har eru nakrar faktiskar útreiðslur, sum ikki slepst undan. Men harafturat koma so tær útreiðslur, sum politikarar dýkja á slík feløg, fyri at fáa ferðaseðlarnar dýrari. Tað er so einfalt sum tað. Hetta er eitt mál, sum Sambandsflokkurin av ølllum kann avgreiða í eini handavend, um vilji er til tess. Tey, sum prædika um bíligari ferðaseðlar, tey eiga greitt at siga, hvør skal gjalda gildið!
Somuleiðis verður tosað um Smyril Line. Her er talan um privat felag, sum er nationaliserað. Her er altso hent tað øvugta, at landið hevur »almannafiserað« eitt privat vinnuvirki, sum ikki kláraði seg.
Viðhvørt er tað neyðugt at gera tað. Tað er eisini neyðugt at lofta einum felag sum Smyril Line, um tað er í vanda fyri at fara á heysin. Tað er bláoygt at siga, at um Norrøna glapp okkum av hondum, so kom bara onkur annar. Tí tað kom eingin annar. Eingin annar er líka »býttur« sum vit, at fara undir slíka farleið. Politikarar, sum siga slíkt, teir eru ikki sína uppgávu vaksnir.
Um teir ikki dáma mátan, ella ikki dáma leiðsluna í felagnum ella okkurt annað, so kunnu tey gera nakað við tað. Bara ikki koma við utopiskum argumentum.
Vit vilja øll varðveita motorvegin uttanlands –?og menna hann. Tað er fyritreytin fyri øllum framburði her á landi. Uppgávan hjá tí almenna er fyrst og fremst at skapa fyritreytirnar fyri, at privat virki kunnu reka hesa vinnu – og so at hjálpa til, um tað ikki kann gerast á privatum grundarlag.
