Men skjótt er at vakna úr dreymaverð, tí longu á nítjanda degi eftir, at løgmaður bar sína »sjálvstýrisætlan« fram, varð hann trýstur upp á pláss av sínum egna flokki – og tað gjørdi hann, sum hann plagar, kunnugt á sínum Facebook-profili í gjárkvøldið:
» – Høvdu ein sera góðan fund í gjár við tingbólki og landsnevnd, semja er um at gerða eina ætlan, um eina nýskipan innanfyri ríkisfelagsskapin, vónandi kann ein sovorðin ætlan verða okkara íkast til eina tjóðarsemju um eitt nýtt samstarv, millum londini í ríkisfelagsskapinum.«
At hetta bleiv niðurstøðan, undrar neyvan nakran. Hóast nógv kunnu nikka til hugskotið hjá løgmanni sum verandi konstruktivt, so er tað tó bara konstruktivt fyri tey, sum ikki velja Sambandsflokkin ella Tjóðveldi. Fyri øll onnur hevði ein tjóðarsemja um ríkisrættarligu støðuna – innan fyri ríkisfelagsskapin á onkran hátt – verið kærkomin. Tá hevði borið til at ført veruligan politikk, heldur enn at halda fram við konfrontatiónspolitikkinum um ríkisrættarligu støðuna, sum hevur verið eksistensurin hjá stórum parti av politisku flokkunum í Føroyum í meira einn heila øld. Onkuntíð av einum meiriluta í tinginum, hóast tað heldur ikki førdi til tjóðarsermjuna.
Tað sigur seg sjálvt, at baklandið í Sambandsflokkinum ressast við av útsøgnunum hjá løgmanni. Og tað sigur seg sjálvt, at tað er sum at fáa salt í sárið at síggja útrættar hendur frá Tjóðveldinum, hvørs umboð fegnast um, at tað loksins blíðkar fyri eygum løgmans.
Tað undrar heldur ikki, at hugskotið spratt úr Fólkaflokkinum, sum síðani 29. oktober seinast hevur verið ideologiska kjølfesti løgmans.
Ikki tí, vit kunnu væl fylgja løgmanni og dreymi hansara. Men vit duga illa at síggja, hvussu tað skal gjøgnumførast í Sambandsflokkinum, sum tá skal skifta pláss við Javnaðarflokkin samríkismegin á politiska ásanum.
Tað verður áhugavert at frætta, hvussu leikur fer. Leikluturin hjá løgmanni seinastu vikurnar hevur veruliga rist grundvøllin undir Sambandsflokkinum – hóast baklandið nú hevur tikið løgmann av ræði, so hevur tað skalað trúvirði floksins og løgmans.
