Hans Pauli Strøm boðaði frá í útvarpinum í gjár, at hann ikki ætlar at brúka fleiri kreftir og tíð til stjórnarskipanaruppskotið. Men hann læt tó dyrnar standa á gloppi soleiðis, at Høgni Hoydal og Jákup Mikkelsen fáa ein kjans at vísa, hvussu tann semjan kann finnast, sum tað ikki hevur borið til at funnið higartil. Tað er tó lítið sannlíkt, at teir megna hetta, men teir skulu sjálvandi sleppa at standa sína roynd.
Hinvegin hava gomlu loysingarflokkarnir, Tjóðveldi og Fólkaflokkurin víst, at teirra vilji til at finna eina pragmatiska loysn er ógvuliga lítil. Tó síggja vit tríggjar mans vísa dirvi: Sjúrður Skaale úr Tjóðveldi, sum hevur argumenterað sera væl fyri sínum sjónarmiðum, Bjarna Djurholm úr Fólkaflokkinum og so Poul Michelsen, fyrrverandi fólkafloksmann, sum nú er í Framsókn. Tað er stórt spell, at teir ikki hava vunnið ljóð fyri sínum sjónarmiðum millum floksfelagar, so vit kundu komið víðari við hesum málinum.
Alt ella einki politikkurin hjá Tjóðveldinum í stjórnarmálum førir onga leið, og við hesum politikki fer flokkurin framhaldandi at ganga sína oyðimarkargongd við loysingarsjónarmiðum, sum flokkurin helst ongantíð vinnur ljóð fyri millum føroyingar, sum ikki ynskja at loysa frá ríkinum.
Vit kundu kanska freistast til at biða um at fáa hasa fólkaatkvøðuna beinanvegin, so vit fáa loysingarspurningin avgreiddan eina ferð med alla. Men tað er heldur eingin loysn, tí vit fáa valla heldur semju um, hvussu vit skulu spyrja.
Loysingarfólk vilja heldur halda seg til eina demokratiskt sera ivasama fólkaatkvøðu í 1946, sum var fyri loysing, enn at fáa eina fólkaatkvøðu nú, sum er ímóti loysing.
Tað besta fyri føroyska samfelagið hevði verið, at okkara kosnu menn og kvinnur komu til eina semju í stjórnarmálinum, so kreftirnar ikki vórðu brúktar meira til fjant og fjas um hetta mál, sum onga leið førir.
– Tá tit ikki vilja loysa hetta málið, so latið tað heldur liggja og farið til arbeiðis við onkrum skilabetri.
Men harra Høgni Hoydal og Jákup Mikkelsen, vísið nú, um stirðil er í tykkum: Tí um tit ikki loysa málið nú, so fara tit at rópa út í tóman heim restina av politisku ævi tykkara!
