Nú níggju umfør eru farin av kappingini í Eik-liguni hjá monnum, er tað framvegis ikki ein spurningur, um ÍF verður annar FM-finalisturin, men heldur bara, hvør sleppur at spæla ímóti ÍF í finalunum. Sum er, er ÍF fimm stig framman fyri Fleyr og sjey stig framman fyri SÍ, sum eru liðini, ið kappast um at sleppa at spæla finalurnar.
At munurin niður til tey bæði liðini ikki er størri, kemst av, at ÍF hevur mist stig fyri ein dyst, har spælari uttan spæliloyvi varð brúktur. Vóru tey stigini ikki farin, er einki sum helst at ivast í, at ÍF bara var uppaftur meira sannførandi á odda í bestu mansdeildini.
Leygardagin var nummar tvey, Fleyr, og vitjaði oddaliðið í ítróttarhøllini á Kambsdali, men tað bleiv ikki nógv annað enn ein styrkidemonstratión frá fuglfirðingum, ið vunnu 3-0. Serliga tey bæði fyrstu settini koyrdi tað væl hjá ÍF, og sjálvt um Fleyr leingi hevði fatur í longra endanum í triðja setti, kom ÍF afturíaftur og vann eisini tað.
Hin mansdysturin um vikuskiftið var í Sørvági, at SÍ tók ímóti Mjølni, og eisini har endaði tað við 3-0 sigri. Men har var munurin ikki so stórur, tí Mjølnir megnaði væl at býta frá sær, uttan tó at fáa nakað sett, hóast lítið restaði í í teimum báðum síðstu.
