Vil amerikanska Kongressin ikki taka undir við einum uppskoti um at økja ta almennu skuldina hjá USA, verður úrslitið ein fíggjarkreppa, sum fer at raka allan heimin. Tað sigur Barack Obama, forseti, í samrøðu við sjónvarpið NBC.
Tann almenna skuldin í USA er nú 14.300 milliardir dollarar, sum svarar til næstan 74.000 milliardir krónur. Tað er hámarkið, men Obama og stjórnin siga, at tað er neyðugt at økja skuldina. Forsetin sigur við NBC, at gongur Kongressin ikki við til at hækka skuldarloftið, fer USA tekniskt á húsagang, og tað fer at órógva allan fíggjarheimin, sigur hann.
Republikanararnir krevja stórar almennar sparingar, áðrenn teir kunnu taka undir við at hækka tað almenna skuldarloftið. Eygleiðarar siga, at flokkarnir fara at finna eina semju áðrenn seinastu freist, sum er tann 2. august.
