Barack Obama, forseti, ætlar sær at styrkja eftirlitið á markinum ímóti Meksiko, og tí umhugsar hann at senda 1.200 hermenn afturat til markið. Høvuðsuppgávan hjá teimum 1.200 hermonnunum verður at forða ólógligum innflytarum at sleppa úr Meksiko til USA og at steðga tí stóra rúsevnaflutninginum, sum gongur sama veg.
Umframt fleiri hermenn ætlar forsetin at biðja Kongressina um 500 milliónir dollarar til at bøta um eftirlitið og vaktarhaldið á markinum á annan hátt.
Meksikanski forsetin, Felipe Calderon, var í síðatu viku í Washington og vitjaði Obama. Tá bað hann amerikanska forsetan taka stig til at forða rúsevnaharkaliðum og øðrum brotsmonnum í Meksiko at útvega sær vápn í USA, sum ter so smugla um markið.
