Barack Obama, forseti, var í nátt á røðarapallinum í Kongressini og greiddi amerikanska fólkinum frá, hvørjar ætlanir hann hevur lagt sær fyri tað seinna valskeiðið.
Forsetin legði stóran dent á búskapin. Hann segði millum annað, at hann hevur sett sær fyri at økja amerikonsku minstulønina úr 7,25 dollarum í 9,00 dollarar um tíman, at hann ætlar at brúka 50 milliardir dollarar til samferðslukervið og at samráðast við ES við tí fyri eyga at økja amerikanska útflutningin.
Sum væntað kom Obama eisini inn á vápnalógina. Hann segði, at arbeiðið við at herða lógina heldur fram, og at hann fer at leggja seg eftir at fáa ein fólkaatkvøðu um at herða vápnalógina.
Obama nam eisini við veðurlagsbroytingarnar og avleiðingarnar av teimum, og hann segði, at tað er neyðugt við fleiri íløgum og meiri gransking innan varandi orku.
Forsetin umrøddi eisini Afghanistan og segði, at amerikanska kríggið har endar innan árslok næsta ár, og at teir 34.000 amerikonsku hermenninir, sum eru eftir í Afghanistan, koma heimaftur.
