Soleiðis segði Djóni Thomassen við Sosialin, eftir at vit áður hava funnist at tí órímiliga í, at hann sum sakførari hevur skrivað rokningar fyri íalt 2,2 mió kr. í einum máli, sum hevur kostað Taks 53 milliónir – umframt rentu.
Tað er skjótt at rokna út, at við hesum takstinum, hevur sakførarin og hansara fylgi nýtt góðar 1.300 tímar til sakarmálið.
So er spurningurin, hvussu stór nytta er í at nýta so nógva tíð til eitt mál, sum var somikið klokkuklárt. Vit hava áður skrivað, at bæði Fíggjarmálaráðið og fíggjarmálaráðharrin vóru vitandi um, at tað bar til at fáa skattafrían vinning úr egnum partafelag. Táverandi aðalstjórin segði, at tað kom politikkur í, tá skattaholið, sum var í kapitalvinningsskattalógini, skuldi tippast, og táverandi fíggjarmálaráðharrin staðfesti enntá í viðtali við Sosialin, at tað bar ikki til hjá sær at fáa politiska undirtøku fyri at tippa nevnda skattahol.
– So tað tykist løgið, at Taks eftirfylgjandi skal biða sakførara nýta 1.300 tímar til at kanna nakað, sum Taks eftir øllum at døma var væl vitandi um.
