Manchester City boðaði í gjárkvøldið frá, at felagið hevur gjørt sáttmála við ein nýggjan verjuleikara. Verjuleikarin, ið talan er um, er 23 ára gamli Eliaquim Mangala, ið felagið hevur keypt úr portugisiska Porto.
Eliaquim Mangala var partur av HM hópinum hjá Fraklandi í summar, men hann spældi tó ikki nakran dyst undir HM endaspælinum.
Mangala sigur við heimasíðuna hjá Manchester City, at hann er væl nøgdur við nýggja felagið hjá sær.
- - Manchester City er eitt stórfelag í Evropa. Tað var umráðandi fyri meg, at taka fetið víðari frá Porto til eitt størri felag. Eg ynski at vinna steyp, og tað er ein av orsøkunum til at eg valdi Manchester City.
Eliaquim Mangala leikti 92 dystir fyri Porto, har hann eisini var við til at vinna tvey meistaraheitir.
