Tað verður fyrrverandi venjarin hjá felagnum, Ionel Gheorghe, sum aftur skal standa við ábyrgdini hjá besta kvinnuliðnum. Afturat nýggja venjaranum, so eru tveir nýggir spælarar komnir til felagið, skrivar Norðlýsið í dag.
Talan er um Onnu Mariu Ecaterinescu og Raluca Ungureanu. Ema Bezanovic, sum kom til felagið í fjør, verður ikki at síggja aftur í felagnum. Heldur ikki Lovisa Lassen verður partur av liðnum komandi kappingarár.
- Vit hava sett Ionel Gheorghe sum venjara. Hann vandi okkara lið í 2011/12 og er tískil kendur í felagnum. Hann hevur so skaffað okkum Onnu Mariu Ecaterinescu, ið fyllir 30 ár í morgin og sum kann røkja bakkpláss og spæliskipara leiklutin. Styrkin hjá henni er at spæla strikuna. Afturat hesum kemur Raluca Ungureanu, ið er síðst í 20’unum, at royndarvenja og hon er ein málverji. Ionel hevur eisini víst á hana, so okkurt talar fyri, at hon fer at skriva undir seinni, sigur Kristoffur Ragnarsson við Norðlýsið.
Hann leggur afturat, at Una Váðklett kemur at virka sum hjálparvenjari hjá besta liðnum.
