Í dag og í morgin verða strandarlandasamráðingar um norðhavssild í London.
Strandarlondini Føroyar, ES, Ísland, Noreg og Rusland hittast í morgun til samráðingar um norðhavssild. Samráðingarnar fara fram á NEAFC-høvuðsborgini í London.
Dagurin í dag og dagurin í morgin eru settir av til samráðingarnar.
Á seinasta samráðingarfundi um norðhavssild, sum var í Cobham í januar mánaði, eydnaðist tað ikki londunum at finna semju um býtið fyri 2015.
Tískil skipa londini fiskiskapin einsæris fyri hetta árið, og samráðingarnar í dag og í morgin snúgva seg tískil um býtið fyri 2016 og næstu árini.
Fiskimálaráðið veit í morgun at siga, at tað er Noreg, sum hevur formansskapin fyri samráðingarnar um norðhavssild fyri 2016, og tað er Noreg, ið hevur kallað til fundar.
Á fundinum í dag og í morgin luttekur, umframt tey fimm strandarlondini, eisini Grønland sum eygleiðaraland.
