Ein røð av nýggjum reglum verða settar í gildi í HM í summar í USA, Meksiko og Kanada.
VAR-skipanin fær ein størri leiklut, tí videodómarar fara at kunna brúka hana til at meta um, hvørt ein leikari skal fáa sítt seinna gula kort.
Eftir galdandi reglum er tað bert beinleiðis reyð kort, sum eru loyvd at verða viðgjørd av videodómarum.
Framyvir kunnu teir eisini brúkast til at kanna, um hornaspark er rætt dømt.
Skeiv hornaspørk verða bert broytt, um videogjøgnumgongdin kann fremjast beinanvegin uttan at seinka dystinum.
Broytingarnar hava verið góðkendar av Altjóða Fótbóltssambandinum (Ifab), sum hevur ábyrgdina av at gera reglurnar í fótbóltsheiminum.
Lógarnevndin hevur eisini samtykt eina røð av tiltøkum, sum skulu vera við til at berjast ímóti tíðarspilli.
Tiltøkini fevna um nýggjar niðurteljingar fyri málspørk, innkast og útskiftingar.
Um ein leikari tekur ov langa tíð, fer bólturin til mótstøðuliðið. Hetta merkir til dømis, at eitt málspark kann gerast til eitt hornaspark.
Leikarar fáa eisini tíggju sekund at fara av vøllinum, tá troyggjunummarið verður víst á skiftingartalvuni.
Taka teir meira enn tíggju sekund, skulu teir fara av vøllinum beinanvegin, og innskifti kann ikki koma inn fyrr enn í næsta leiksteðgi, eftir at ein minuttur afturat er spældur.
At enda skulu leikarar, sum fáa viðgerð fyri skaða ella skaða, sum steðgar spælinum, fara av vøllinum í ein minutt, áðrenn teir sleppa aftur.
Broytingarnar koma í gildi 1. juli og verða sostatt galdandi frá næsta kappingarári.
Tær fara tó eisini at galda longu undir HM-endaspælinum, sum byrjar 11. juni.
Fótbóltsmyndugleikarnir fara eisini at umrøða nýggjar reglur fyri støður, har leikarar fara av vøllinum sum mótmæli móti avgerðini hjá einum dómara.
Tað fer eisini at fevna um støður, har leikarar dekka munnin við hondunum, tá teir møta mótstøðumanni.
Ritzau/AFP
