Í fleiri mánaðir hava søgur gingið um, at Helle Thorning-Schmidt skal hava eitt av leiðarastørvunum í ES. Trý størv skuldu mannast av nýggjum.Tað fyrsta, formansstarvið í ES-nevndini, fór til Jean Claude Juncker úr Luksenburg í gjár, og so er eftir at manna formansstarvið í Evropska Ráðnum og starvið sum uttanríkisleiðari. Harafturat skal Evrubólkurin hava nýggjan formann, men har er Danmark ikki við.
Í kvøld klokkan hálvgum seks koma ríkis- og stjórnarleiðararnir saman til ein góðan døgurða, og eygleiðarar vænta, at tá verða avgerðirnar tiknar.
Sjálv hevur Helle Thorning-Schmidt fleiri ferðir víst aftur, at hon skal hava eitt av teimum leiðandi ES-størvunum, men framvegis ganga tíðindi um, at hon skal taka við eftir Herman Van Rompuy sum formaður í Evropska Ráðnum ella ES-forseti.
So eina ferð í kvøld ella út á náttina fáa danir at vita um framtíðina hjá teirra stjórnarleiðara. Fer hon til Bruxelles, verður tað Mette Frederiksen, sum fer at taka við sum forsætisráðharri.
