Nú røkist loksins fyri, at hundafangari verður settur á Tvøroyri.
Tvøroyrar Býráð hevur arbeitt í fleiri ár við at fáa eina skipan, so at hundar, seyður, og onnur djór, sum ganga leys, verða tikin upp.
Tað hevur verið eitt langt og drúgt samskifti við fútan um ætlanina, tí fútin skal góðkenn hana.
Men nú er seinasta útspælið komið frá fútanum og tað hevur býráðið samtykt á fundi í farnu viku.
Endaliga ætlanin er so aftur send fútanum til góðkenningar, men Kristin Michelsen, borgarstjóri sigur, at nú væntar hann, at ætlanin verður góðkend. Og tá ið býráðið hevur fingið fráboðan um tað, verður hundafangarin settur og tað væntar hann, verður einaferð í summar, ella beint eftir summarfrítíðina.
Endamálið við hundafangaranum, verður at taka hundar, seyð, gæs, dunnur, og onnur djór, sum ganga leys, upp.
Og tað er lítið af ivast í, at hetta verður kærkomið á Tvøroyri, tí tað eru javnan at tvørafólk gremja seg á Facebook um, at hóast býurin skal eitast at vera friðaður fyri seyð, er ta ein afturvendandi trupulleiki, seyður gongur leysur inni í býnum og ger seg inn á urtagarðar hjá fólki og er til stóran ampa.
Tað verður eisini í heilum gjørt vart við, at hundar ganga leysir og leypa ótta á fólk, serliga á børn.
Kristin Michelsen sigur, at hvat hundum viðvíkur, er hetta galdandi fyri alla kommununa.
Men hvat seyði, og øðrum djórum viðvíkur, er hetta bara galdandi fyri markatalsbygdirnar, Froðba og Trongisvág, ella úr Froðba inn í Trongisvág og yvirum til Hellá, sum er nakað innanfyri Drelnes, har markið ímillum Trongisvág og Ørðavík, gongur.
Tey í Ørðavík vórðu ikki sinnað at vera við í avtaluni, sigur Kristin Michelsen.
Men hann sigur, at tey vóna at fáa at fáa eina avtalu við ørvingar um at fáa upptøkuøkið hjá hundafangaranum til at umfata ein part av teirra øki, um ikki annað, so inn um ferjuleguna á Krambatanga, har Smyril leggur at, so at tað í øllum førum verður friður fyri leysgangandi dýrum við Mentanarhúsið Salt og ferjuleguna hjá Smyrli.
