Á eyka bygdarráðsfundi í Sands kommunu herfyri varð einmælt samtykt at taka av tilboði hjá J&K Petersen um at planera og gera grundstykkið til nýggjan barnagarð á Sandi byggibúgvið.
- Grundstykkið er keypt frá Jógvani og Marini í Klingruni, og stykkið liggur sum nærmasti granni til nýggju útstykkingina á Skarðsbøi, siga tey í Sands kommunu.
Vit kunnu leggja aftrat, at í nýggju útstykkingini, sum J&K Petersen eru í holt við, verða umleið 34 nýggj grundstykki klár at byggja á um nakrar mánaðir.
- Arbeiðið við nýggju útstykkingini gongur sera væl og verður liðugt í november/ desember í ár, verður lagt aftrat.
Í Sands kommunu siga tey, at arbeiðið at planera og gera grundstykkið til nýggja barnagarðin byggibúgvið byrjar hálvan august í ár.
##med2##
- Vit eru ovurfegin um, at fólk velja at seta búgv í okkara kommunu, og soleiðis er tað eisini hugaligt at síggja, at enn eini sethús nú verða reist á Sandi.
Loksins er nú nýggjasti parturin av Ovaravegi á Sandi asfalteraður, og her hevur kommunan valt at gera gongubreyt fyri at gera vegastrekkið tryggari.
Hetta er samstundis fyrsta gongubreyt á Sandi. Tvær vegbungur skulu eisini gerast á vegnum, eins og tveir lyktapelar skulu flytast.
- Vit hoyra javnan frá fólki, sum siga, at vegirnir gjøgnum Sandsbygd er vánaligir, og hetta fara vit at gera nakað við í næstum, siga tey í Sands kommunu.
##med3##
