Nú fær Suðuroyar Sjúkrahús útgerð til dialysuviðger. Í dag hevur stjórin á Suðuroyar Sjúkrahúsi, Hans Pauli Henryson, skrivað undir avtalu um keyp av útgerð til dialysuviðgerð, útgerðin verður leverað á Suðuroyar Sjúkrahúsi í desembur í ár.
Løgtingið setti eina millión av á fíggjarlógini fyri 2022 til dialysu á Suðuroyar Sjúkrahúsi, hesin peningur er nú brúktur til keyp av nevndu útgerð.
Í vár var stjórin á Suðuroyar Sjúkrahúsi frammi í miðlunum har hann segði at tey á Suðuroyar Sjúkrahúsi fóru at gera eitt uppskot til skipan av dialysuviðgerð á Suðuroyar Sjúkrahúsi. Hetta uppskotið skuldi vera liðugt tíðliga í heyst. Uppskotið er nú liðugt og tað er sent leiðsluni í Sjúkrahúsverkinum til viðgerðar.
Gongst sum ætlað - og verður peningur játtaður til endamálið - fer Suðuroyar Sjúkrahús at veita dialysu næsta ár og tað merkir, at teir suðuroyingar, sum nú noyðast norður til Havnar fleiri ferðir um vikuna at fáa dialysu, kunnu fáa hana á Suðuroyar Sjúkrahúsi ístaðin.
– Vónandi verður hetta endin á einari langari søgu í føroyska sjúkrahúsverkinum, tí tað eru mong ár síðani, at málið um at hava dialysu aðrastaðni enn á Landssjúkrahúsinum, tók seg upp, sigur Hans Pauli Henryson.
