Nú fáa eisini vágbingar kampingpláss

Í eina tíð hevur verið arbeitt við at gera eitt kampingpláss í Vági og nú er rættilig gongd komin á arbeiðið, sigur Vágs Býráð í morgun.

Kampingplássið verður eystanfyri Vágs Høll, ímillum høllina og Vatnið.

Tey, sum fara at brúka kampingplássið, fáa samstundis atgongd til hentleikarnar ítróttarhøllini og VB Húsinum, sum er beint við kampingplássið. Í VB húsinum eru bæði brúsur, wc og sauna, umframt vaskimaskina og turkitrumla, skuldi tørvur verið á tí.

Á kampingplássinum fer eisini at bera til at tøma rottangan og at fáa vatn og streym til vognarnar.

Tað er enntá eisini eisini er internet á kampingplássinum.

 
Á Kampingplássinum er stutt til Vatnið, til fótbóltsvøllin og vestur á sjáldsama náttúruvakra Vágseiði, sigur Tórður Poulsen, formaður í Teknisku nevnd í Vági.
 

Kampingplássið verður gjørt í fleiri stigum. Í ár verða tey fyrstu 12 plássini gjørd liðug.  Næsta ár verður tað gjørt størri , samstundis sum nýggir hentleikar verða til taks.

Kampingplássið verður ætlandi klárt at taka í nýtslu í juni mánað.