Stranda Ítróttarfelag skrivar soleiðis í kvøld:
STÍF hevur við stórari gleði sett fýra nýggjar venjarar til BURN-liðið: Marius Joensen, Sveinur Justinussen og Pauli G. Hansen og Alexandur Johansen. Teir eru allir fyrrverandi STÍF-leikarar, og kenna tí bæði felagið, spælistílin og sterka STÍF-andan sera væl. Hetta ger, at teir koma inn í uppgávuna við einum tryggum grundarlagi og einum felagshuga, sum longu gongur í gjøgnum alt felagið.
Marius verður ábyrgdarvenjari.
Marius, Sveinur, Pauli og Alexandur hava hvør fyri seg drúgvar royndir innan hondbólt og hava gjøgnum árini víst bæði arbeiðssemi, áræði og virðing fyri ítróttinum. Felagið er sannført um, at teirra fakligi styrkur og góða samstarv førir við sær eina týðandi menning av okkara ungu leikarum.
Endamálið hjá nýggja venjarahópinum er greitt: STÍF skal aftur liggja í toppinum av føroyskum hondbólti. Við eini greiðari visjón og einum vælskipaðum venjingartilfari leggja teir dent á at menna tekniska førleikan, styrkina, liðsandan og sjálvsálitið hjá spælarunum. Saman við felagnum vilja teir byggja eitt sterkt grundarlag fyri framtíðini, har STÍF aftur kann kappast við tey bestu – og vinna sær sín rætta pláss í toppinum.
Vit í STÍF eru ovurføgin um hesa mannferðina og hava fulla álit á, at nýggju venjararnir fara at skapa menning, gleði og úrslit á vøllinum. Vit ynskja teimum góða eydnu í arbeiðnum og síggja fram til ein spennandi og mennandi hondbóltsvetur, skrivar StÍF í kvøld.
Fyrsta royndin hjá StÍF við nýggju venjarunum verður í morgin klokkan 16, tá ið VÍF verður gestur í ítróttarhøllini á Skála.
Tað var 17. november, at tað frættist, at danski venjarin Jesper Bak var givin á Strondum og farin til hús.
