Nú er aftur full ferð á hjá teimum á flogvøllinum í Vágum. Eftir eina rættiliga slaka byrjan, ímeðan omikron framvegis herjaði, fór ferðafólkatalið á Vága Floghavn upp um talið í mai í 2019, sum var tað seinasta korona-fría árið. Í mai í ár var ferðafólkatalið nevniliga 7,7 prosent hægri enn tað var í mai mánað í 2019. Í mai í ár feraðust 43.583 fólk um flogvøllin í Vágum afturímóti teimum 40.474 fólkunum, sum fóru um floghavnina í mai 2019.
##med2##
– Hóast tað gekk illa fyrst í árinum, sær nú út til, at vend er komin í og vit hava góðar vónir fyri summarinum og restini av árinum, sigur Regin I. Jakobsen, stjóri á flogvøllinum, í eini frágreiðing.
Sum støðan er nú, væntar hann, at summarið fer at líkjast tí vit sóu í 2019, kanska eitt vet betri, leggur hann afturat. Men hann ásannar eisini, at hóast útlit eru fyri einum góðum summari skal kortini nokk so fitt til, at metárið 2019 verður tikið.
