Støðutalvan sigur, at NSÍ eigur fjórði besta liðið. Kortini hevur liðið higartil ikki megnað at vinna ímóti øðrum enn trimum teimum niðastu – AB, B68 og Skála. Tættast við at vinna ímóti øðrum enn hesum trimum higartil í ár var NSÍ, tá ið tað endaði málleyst ímóti EB/Streymi við Margáir.
-Hesa ferð endaði tað 2-2 í stevnudystinum á heimavølli ímóti ÍF. Avrikið var ikki soleiðis, sum tað var, tá ið vit taptu á heimavølli ímóti B36 og HB. Tað hevur alt at siga, at vit í kvøld runda orduliga av, áðrenn vit fara í summarfrí. Vit hava brúk fyri at vinna í kvøld, sigur NSÍ venjarin Trygvi Mortensen.
Í Sundalagnum hevur fótbóltslagið onkuntíð verið betri, enn tað er í løtuni. Fyrsta tapið í Klaksvík í ellivu ár var steinur oman á byrðu, eftir at liðið varð varpað úr steypakappingini og so legði rygg til 2-1 heimatap ímóti ÍF:
-Hetta sær út til at verða eitt keðiligt ár við nógvum upp og niður. Nú mugu vit fáa nakað burturúr í Runavík og so arbeiða hart í summarfrítíðini, nú vit ikki skulu luttaka í europeisku kappingini í summar, sigur EB/Streyma liðformaðurin Gert Hansen.
Fyri EB/Streym kemur tað illa við, at Pól Jóhannus Justinussen ikki er tøkur ímóti sínum gomlu liðfeløgum.
