Tað var undirhald fyri allar pengarnar, tá ið NSÍ í grannauppgerð tók ímóti Víkingi.
NSÍ skoraði fýra mál í fyrra hálvleiki. Úrtøkan úr uppløgdum málmøguleikum var framúr stór. NSÍ átti fýra møguleikar í brotsteiginum, og tað fekk heimaliðið fýra mál burturúr.
Eftir steðgin koppaði alt. Víkingur minkaði beinanvegin um munin, og so vóru víkingarnir nógv grammari, betri i nærdystunum og neyvari í samanspælinum.
Tá ið Pól Jóhannus Justinussen hjá NSÍ sá gult fyri aðru ferð og heimaliðið harvið var undirmannað, gekk nógv tað mesta fyri seg í og kring NSÍ brotsteigin.
Talan var um fleiri spentar støður eftir deyðbóltar, bólturin var á stólpanum aftanfyri NSÍ málverjan, og Tórður Thomsen var brandur í NSÍ málinum.
Tað eydnaðist Víkingi at minka um munin til 4-2, men tá var so lítið av tíð eftir, at spenningurin var burtur.
NSÍ hevur eftir fýra dystir sjey stig, og Víkingur hevur fýra stig.
NSÍ – Víkingur 4-2 (4-0)
1-0: Klæmint A. Olsen
2-0: Jann Martin Mortensen
3-0: Klæmint A. Olsen
4-0: Jann Martin Mortensen br
4-1: Andreas Lava Olsen
4-2: Adeshina Lawal
Dómari: Eiler Rasmussen
NSÍ: Tórður Thomsen – Pætur Hentze, Oddur Á. Højgaard, Jóhan Troest Davidsen, Pól Jóhannus Justinussen – Peder Nersveen, Magnus H. Olsen – Jann Martin Mortensen, Búi Egilsson, Jann J. Benjaminsen – Klæmint A. Olsen
REYTT KORT: Pól Jóhannus Justinussen 57.
Víkingur: Elias Rasmussen - Gert Hansen, Gunnar Vatnhamar, Milan Svojic, Hanus Jacobsen - Andreas Lava Olsen, Vukasin Tomic, Heðin Hansen, Dion B. Splidt - Sølvi Vatnhamar - Adeshina Lawal
---
LIÐUGT
4-2
91) 4-2
4-2: Adeshina Lawal
Eftir langt innkast úr høgru og sending út frá baklinjuni smekkar Aseshina Lawal bóltin í málið.
90) 4-1
Fýra minuttir eru lagdir aftrat.
88) 4-1
NSÍ skiftir út: Verjuspælarin Per Langgaard avloysir miðvallaran Jann Martin Mortensen.
86) 4-1
GULT KORT: Andreas Lava Olsen hjá Víkingi.
82) 4-1
Sølvi Vatnhamar roynir seg við frísparki úr átjan metrum, og Tórður Thomsen tveitir seg og bjargar sera væl.
81) 4-1
Víkingur vinnur fríspark mitt fyri og átjan metrar úr NSÍ málinum.
79) 4-1
Tað regnar, og undanvindurin hjá Víkingi er vaksin. Síðstu lítlu løtuna hevur trýstið ímóti NSÍ málinum ikki verið so stórt og støðugt, sum tað var eina løtu.
77) 4-1
Síðstu løtuna hevur tað mesta gingið fyri seg í og kring NSÍ brotsteigin. Talan hevur verið um fleiri spentar støður, men tað verður bíðað eftir upplagda málmøguleikanum.
68) 4-1
NSÍ skiftir út: Betuel Hansen avloysir Magnus H. Olsen.
66) 4-1
NSÍ er støðugt í verjustøðu, og Víkingur er støðugt í álopi. Nú rakti bólturin handara stólpan eftir horna úr høgru frá Hanusi Jacobsen. Tað var Andreas Lava Olsen, sum royndi seg við stútara.
63) 4-1
Víkingur skiftir út fyri triðju ferð: Philip Djordjevic avloysir Dion B. Splidt.
60) 4-1
Víkingarnir eru hamskiftir. Teir vinna nærdystirnar, sum teir ikki vunnu í fyrra hálvleiki, teir bjóða seg til, og teir spæla seg til góðar málmøguleikar og deyðbóltar - bæði fríspørk og hornaspørk.
56) 4-1
REYTT KORT: Pól Jóhannus Justinussen hjá NSÍ sær gula kortið fyri aðru ferð og harvið eisini tað reyða.
52) 4-1
So er aftur tætt við, at Víkingur skorar. Tórður Thomsen í NSÍ málinum bjargar meistarliga, tá ið tað við handara stólpa og úr stuttari fjarstøðu verður stútað, eftir at Hanus Jacobsen við frísparki legði innfyri eitt sindur úr vinstru.
51) 4-1
Bárður J. Hansen avloysir Búa Egilsson hjá NSÍ.
48) 4-1
4-1: Andreas Lava Olsen
Hanus Jacobsen leggur við frísparki úr vinstru og til handara stólpa, har tað verður stútað innfyri aftur, og so stýrir Andreas Lava Olsen bóltin í málið.
--
Spælararnir eru á veg av vøllinum. Máltalvan vísir 4-0. NSÍ hevur vunnið mest sum fulla úrtøku úr møguleikunum, sum heimaliðið hevur havt í brotsteiginum.
Fyrstu løtuna var tað ikki so stórur á liðunum, og eftir innlegg og deyðbóltar hevði Víkingur onkrar møguleikar, uttan at tað eydnaðist at vinna úrtøku.
Eftir at heimaliðið hevði lagt seg framum 2-0, sást munur á liðunum. NSÍ var flúgvandi, og víkingarnir hingu við høvdinum.
Víkingavenjarin Sámal Erik Hentze gjørdi tvær skiftingar. Av vøllinum fóru Gert Hansen og Vukasin Tomic og á vøllin vórðu settir Pól Enok Hansen og Elias Lervig.
Víkingaliðið var um skipað á tann hátt, at Pól Enok Hansen varð settur í miðverjuna fyri Gunnar Vatnhamar, sum varð fluttur fram á miðvøllin. Elias Lervig avloysti Gert Hansen á vongverjanum í høgru.
---
HÁLVLEIKUR
4-0
45) 4-0
Ein minuttir lagdur aftrat.
43) 4-0
4-0: Jann Martin Mortensen br
Eiler Rasmussen peikar á brotssparksblettin, tá ið Pól Enok Hansen setir beinið fyri Klæmint A. Olsen, sum fer um koll í brotsteiginum. Jann Martin Mortensen, sum hevur verið við í uppspælinum til hini trý málini, er púra tryggur, tá ið hann úr ellivu metrum setir bóltin í málið.
40) 3-0
3-0: Klæmint A. Olsen
NSÍ gongur so at siga á vatninum, meðan tað sær alt annað enn væl út hjá Víkingi. Hesa ferð átti vongverjin í høgru Pætur Hentze innleggið, og aftur var tað Klæmint A. Olsen, sum mitt fyri málinum og við høvdinum setti bóltin í netið.
3-0 og onkrir víkingar tveita seg í ráðaloysi á vøllin.
36) 2-0
Víkingur skiftir út:
Av vøllinum fara vongverjin Gert Hansen og miðvallarin Vukasin Tomic.
Á vøllin verða settir Pól Enok Hansen og Elias Lervig.
33) 2-0
2-0: Jann Martin Mortensen
Peder Nersveen roynir seg við fínum langskoti. Elias Rasmussen hálvbjargar, og Jann Martin Mortensen er eitt sindur til vinstru fyrstur á returbóltinum.
Víkingur fyrireikar tvær útskiftingar.
30) 1-0
Pól Jóhannus Justinussen ger fríspark ímóti Andreas Lava Olsen tríggjar metrar frá baklinjuni í høgru. Hanus Jacobsen leggur innfyri, og Gunnar Vatnhamar stútar við handara stólpa væl omanfyri málið. Stórur Víkinga møguleiki.
27) 1-0
Víkingur spælir uppá tvørs frammanfyri egnan brotsspark. Tað endar við NSÍ frísparki mitt fyri og úr 20 metrum, men Klæmint A. Olsen sendir bóltin bæði omanfyri manngarðin og málið.
25) 1-0
Víkingur pressar øgiligt og vinnur horna, sum einki spyrst burturúr.
22) 1-0
1-0: Klæmint A. Olsen
NSÍ vinnur bóltin á miðvøllinum. Víkingaverjan er ikki ansin, tá ið Jann Martin Mortensen verður leysur eitt sindur til vinstru í brotsteiginum, hann spælir uppá tvørs til Klæmint A. Olsen, sum takkar fyri og setir bóltin framvið Eliasi Rasmussen og í málið.
21) 0-0
Fínt Víkingauppspæl endar við innleggi úr høgru frá Gert Hansen, Adeshina Lawal roynir seg við stútara, men bólturin fer væl omanfyri málið.
18) 0-0
Jann Benjaminsen roynir seg við frísparki ur 22 metrum. Bólturin fer omanfyri manngarðin og Elias Rasmussen í Víkingamálinum tveitir seg og bjargar dygst niðri við stólparótina.
13) 0-0
Nú var vandamikið frammanfyri NSÍ málið. Eftir kiks í NSÍ uppspælinum á egnari hálvu var borið skjótt at í høgru, og so fekk Tórður Thomsen í NSÍ málinum fatur á bóltinum, tá ið tað varð lagt innfyri.
12) 0-0
Líkindini at spæla eru heilt góð við Løkin. Tað er turt og eitt heilt lítið høgættarlot. Men tað er bítandi kalt.
09) 0-0
NSÍ miðvallarin Peder Nersveen smekkar til úr 20 metrum, og Elias Rasmussen bjargar. Royndin var eftir fínt NSÍ samanspæl.
05) 0-0
NSÍ hevur havt horna í vinstru, men tað spurdist einki burturúr.
00)
Víkingaliðformaðurin Atli Gregersen er leikbannaður. Gunnar Vatnhamar er fluttur av vongverjanum í høgru og í miðverjuna. Veteranurin Gert Hansen er miðverji fyri fyrstu ferð síðani í 2017.
NSÍ – Víkingur kl. 19.00
Dómari: Eiler Rasmussen
NSÍ: Tórður Thomsen – Pætur Hentze, Oddur Á. Højgaard, Jóhan Troest Davidsen, Pól Jóhannus Justinussen – Peder Nersveen, Magnus H. Olsen – Jann Martin Mortensen, Búi Egilsson, Jann J. Benjaminsen – Klæmint A. Olsen
Víkingur: Elias Rasmussen - Gert Hansen, Gunnar Vatnhamar, Milan Svojic, Hanus Jacobsen - Andreas Lava Olsen, Vukasin Tomic, Heðin Hansen, Dion B. Splidt - Sølvi Vatnhamar - Adeshina Lawal
