Á ovurhondsstóra Boris Paichadze leikvøllinum í Tblisi spældu runavíkingar í gjárkvøldi. Umstøðurnar vóru ikki tær, sum Óli Hansen, Jónhard Fredriksberg, Nenad Stankovic og hinir eru vanir við við Løkin. Á Boris Paichadze leikvøllinum var áskoðaratalið helst hægri, enn tað nakrantíð hevur verið við Løkin í Runavík, men 3000 áskoðararnir munaðu lítið, tá stadion rúmar 55.000 fólkum. Eisini var hitin meiri enn føroyingar eru vanir við – omanfyri 30 hitastig.
Tað síðsta, sum eisini var óvanligt hjá NSÍ var, at venjarin Johan Nielsen ikki var við. Sambært Dimmalætting hevur hann brotið nøkur rivjabein, og tí setti hann seg ikki føran fyri at fara undir drúgvu ferðina.
Keðiliga byrjan
Um tað vóru óvændu umstøðurnar, sum gjørdu, at NSÍ fekk eina so keðiliga byrjan er ilt at siga, men longu tá sjey minuttir vóru spældir, hevði heimaliðið lagt seg omaná. Og bara tríggjar minuttir seinni høvdu georgisku meistararnir staðfest, at NSÌ ikki skuldi vænta sær nakað sum helst burtur úr dystinum.
Hálvan tíma inn í dystin fekk heimaliðið brotsspark, og so var 3-0. Í seinna hálvleiki skifti Dynamo Tblisi eitt sindur av fólki út, og fleiri mál enn tað sama komu ikki. Móti dystarenda sá málverjin Tórður Thomsen gult fyri aðru ferð, og noyddist sostatt av vøllinum. Tískil fór landsliðsleikarin Einar Hansen í málið, og helt tað reint minuttirnar, ið eftir vóru.
Harvið endaði dysturin 3-0, og NSÍ er at meta sum liðugt í altjóða fótbólti í ár. Men verður hugt at úrslitum, ið onnur føroysk lið hava fingið í Georgia. Áður hevur HB tapt bæði 5-0 og 6-0 móti ávíkavist FC Wit í 2005 og Batumi B36 tapti 5-2 móti Torpedo Kutaisi í 2002.
Seinni dysturin millum NSÍ og Dynamo Tblisi verður á Ovara Vølli í Gundadali týskvøldið 22. juli kl 19.00. Hóast spenningurin um NSÍ fór at spæla seg víðari, má sigast at vera farin, so verður annað áhugavert at eyðgleiða. Millum annað verður spennandi hvør skal verja málið, nú Tórður Thomsen er leikbannaður.
