NSÍ
Eftir at tað leingi hevur gingið heilt væl, er tað tvær tær seinastu ferðirnar vorðið púra greitt, at NSÍ hevur stórar trupulleikar í verjupartinum. Á Sevmýri fóru fýra mál ígjøgnum, og sunnudagin royndist verjuparturin uppaftur lakari, tá ið EB/Streymur skoraði fimm mál.
- Vit leggja bragdliga fyri, og vit fáa góða úrtøku. Teir koma afturíaftur, tá ið vit eru alt ov lítið nærlagdir í verjupartinum, men eg haldi, at vit fóta okkum aftur fyrstu løtuna eftir steðgin. Tá ið teir so skora til 3-2, satsa vit eitt sindur, og tá eru teir ógvuliga vandamiklir.
Tað sigur Trygvi Mortensen, venjari í NSÍ. Hann kennir EB/Streyma spælararnar, sum hann vandi fyri trimum árum síðani.
- Teir eru sanir snillingar, men tað fjalir ikki veruleikan, at vit eru alt ov lítið nærlagdir í verjupartinum. Eftiransingarnar eru ikki nóg góðar, og vit gera eina rúgvu av persónligum mistøkum, sum eiga at verða og vórðu sektað á hesum støðinum. Hatta mugu vit lúka burtur, sigur Trygvi Mortensen, sum sigur seg ikki hava mist mótið um at røkka bronsukrónunum.
- Vit mistu bara eitt stig sammett við Skála. Men í mun til bronsuplássið mistu vit trý stig, so nú hava vit ryggin móti múrinum. Men vit mugu royna at koma afturíaftur. Sjálvandi eru vit vónbrotnir um, at 2-0 leiðsla skuldi enda við 5-2 tapi, men tað er ikki annað at gera enn at arbeiða miðvíst undir venjingunum og so at vinna í Gøtu, heldur NSÍ venjarin.
