Um hálvgum sjey tíðina í gjárkvøldið noyddist løgreglan í Havn oman á Eystaru bryggju at halda skil á ferðsluni, tí steðgur var komin í.
Orsøkin var, at Norrøna og Smyril vóru í ferð við taka bilar umborð samstundis, og teir nógvu bilarnir gjørdu, at ferðslan á havnarlagnum steðgaði upp.
Tað eydnaðist tó løgregluni at greiða fløkjuna, so gongd kom aftur á ferðsluna.
Tey, sum skuldu suður við Smyrli í gjárkvøldið, máttu brynja seg við toli, og skipið var meiri enn ein tíma seinkað av Havnini. Tá var Smyril eisini stúgvandi fullur, og fleiri bilar stóðu eftir á bryggjuni, tá skipið loysti.
