Norðurlond eiga at savna sínar royndir, og leggja eina felags strategi fyri at steðga fráflyting, serliga av kvinnum.
Tað halda Høgni Hoydal og Bjørt Samuelsen, sum eru umboð og varaumboð í Norðurlandaráðnum. Við ársenda í fjør løgdu tey tí fyri Norðurlandaráðið eitt uppskot um felags norðurlendsk átøk fyri at venda fráflyting til tilflyting. Uppskotið kemur nú til viðgerðar í Medborger- og Forbrugerudvalget, í sambandi við Norðurlandaráðsfund í Stokkhólmi í hesi vikuni.
Í uppskotinum vísa tingfólkini á, at fráflyting og miðsavnan er ein stórur trupulleiki í fleiri pørtum av Norðurlondum.
Nógv hagtøl eru savnað, og granskað er í ríkiligan mun í orsøkunum til fráflyting, miðsavnan og trupulleikunum við, at ávís øki verða skeiklaði í fólkasamansetingini. Tíðin er búgvin at umseta hesa vælkvalifiseraðu vitan, sum er savnað í norðurlendskum høpi, til felags politisk átøk, sum kunnu venda gongdini. Og har Norðurlondini kunnu brúka royndir hvør hjá øðrum.
Hóast fólkatalið minkar í fleiri pørtum av teimum ymsu norðurlondunum, so hava øll londini, samlað sæð, útlit til fólkavøkstur í framtíðini Føroyar tó undantikið. Kortini eru trupulleikarnir sera meinlíkir fyri Føroyar og tey økini, har fólkatalið minkar: Fráflytingin er størri enn tilflytingin, burðaravlopið minkar og tað eru serliga eru kvinnurnar, sum flyta og ikki hava hug at venda aftur.
Í uppskotinum, sum er lagt fyri Norðurlandaráðið, er tí serligur dentur lagdur á kvinnurnar. Í uppskotinum verður millum annað mælt til, at Norðurlandaráðið heitir á stjórnirnar í Norðurlondum um:
- At orða og leggja fram ein miðvísa ætlan fyri at steðga fráflytingini og skapa vøkstur í økjum, har fólkatalið minkar
- At heildarætlanin fevnir um ítøkilig uppskot til, hvussu fleiri kvinnuarbeiðspláss verða fingin til vega
- At heildarætlanin fevnir um bøttar møguleikar hjá kvinnum at stovnseta egna fyritøku
- At heildarætlanin fevnir um útbúgvingarmøguleikar fyri kvinnur, eisini fjarundirvísing og vaksnamannaútbúgving
Og at stjórnirnar í sínum fíggjarlógum seta pening av, so hesar felagsætlanir kunnu setast í verk.
Uppskotssetararnir fegnast um, at uppskotið kemur til viðgerðar samstundis sum vit her heima viðgera tiltøk av venda gongdini.
Uppskotið kann lesast VIÐ AT TRÝSTA HER
