Eitt lágtrýst fer móti Íslandi úr suðri og tilhoyrandi brúgvaløg liggja nær Føroyum til leygardagin. Um vikuskiftið floymir køld luft við ælaveðri inn yvir Føroyar frá vestri og útnyrðingi. Mánadagin verður aftur lýggjari, men óstøðugur vindur úr útsynningi.
Hósdagin øtlar hann vindin upp í eitt stívt andøvsgul upp í hvassa vind av suðri og útsynningi. Skýggjað og regn av og á og hitin millum fimm og átta stig. Um náttina makar hann vindin til eitt lítið lot av vestri. Norðanfyri klárar í, annars mest skýggjað við regni av og á og hitin millum trý og sjey stig.
Fríggjadagin fyrst regni, men síðani klárar í úr suðri við einum guli til stívum andøvsguli og hitin veksur til 6 til 9 stig. Seinnapartin verður andøvsgul upp í ein strúk av vindi, og um kvøldið upp í hvassan vind. Sól ella skýggjað. Um náttina øtlar hann vindin til strúk í vindi upp í skrið av suðri, seinni útsynningi. Skýggjað og ælaveður. Hitin alt samdøgrið millum trý og átta stig.
Leygardagin verður strúkur í vindi upp í skrið av útsynningi, um náttina av vestri. Samdrigið og ælaveður, partvís við heglingi ella vátaslettingi. Hitin millum tvey og seks stig.
Sunnudagin verður strúkur í vindi upp í skrið av vestri, sum snarar í ein útnyrðing makar niður í gul til stívt andøvsgul. Samdrigið og heglins- ella kavaælum. Hitin um trý stig. Um náttina eitt lot til andøvsgul, sum snarar í ein útsynning. Turt og yvirhøvur klárt, seinni skýggjað og kanska reg. Hitin millum frostmarkið og fimm stig.
Mánadagin verður andøvsgul upp í ein strúk av útsynningi. Skýggjað, við regni og sirmi, og hitin millum fimm og átta stig.
Týsdagin verður stívt andøvsgul upp í hvassan vind av útsynningi og vestri. Sól til tíðir og yvirhøvur turt og hitin millum fýra og átta stig.
