Vaktleiðarin á løgreglustøðini í Havn boðar nú frá, at tað eru avbjóðingar í ferðsluni ymsastaðni kring landið, og tað er ikki óvist, at avbjóðingarnar kunnu gerast enn fleiri, um tað heldur fram at kava.
- Vegurin um Gøtueiðið er stongdur í løtuni, tí her standa persónbilar og fleiri trailarar fastir. Helst verður neyðugt at sleipa onkrar bilar burtur, so Landsverk sleppur at gera sítt arbeiði við kavagrevstri.
Vaktleiðarin sigur, at stórar avbjóðingar eisini á Sandavágshálsi, har fleiri bilar eisini standa fastir.
- Tað er ikki óhugsandi, at vit fara at fáa fleiri avbjóðingar í ferðsluni á ávísum støðum, um tað heldur fram við at kava, eitt nú á Vestmannavegnum, á Heltnini í Oyndarfirði og møguliga aðrastaðni við.
Løgreglan sigur, at ráðini eru ikki at fara út at koyra óneyðugt, soleiðis sum líkindini eru í løtuni. Landsverk er í gongd fleiri staðni, men Landsverk kann ikki megna allar uppgávur samstundis.
- Fara fólk út at koyra kortini, er neyðugt at vísa størsta varsemi og taka neyðugt atlit - og ikki minst at geva tol í ferðsluni, nú koyrilíkindini eru so avbjóðandi á fleiri vegastrekkjum, verður lagt aftrat.
Dagføring:
Tíðliga í kvøld varð vegurin um Gøtueiði opin aftur, men sagt verður, at neyðugt er við størsta varsemi, um fólk ætla sær um hesar leiðir í bili. Sama er aðrastaðni kring landið, tá koyrt verður uppi í hæddunum.
