Hagtølini hjá Strandferðsluni yvir ferðandi á páskum benda á, at ein veruligur tørvur var á at sigla halgidagarnar.
Tað var í heyst, at løgtingið játtaði Strandfaraskipum Landsins pening á fíggjarlógini, so at hon skuldi sigla halgidagar eisini, so sum langa fríggjadag og páskadag. Í ár var hetta roynt fyrstu ferð á páskum, og tað tykist, sum fólk halda hesar eyka túrarnar vera kærkomnar.
1089 ferðaseðlar vóru seldir langa fríggjadag meðan 1538 vóru seldir páskadag. Skírisdag vóru 1712 ferðaseðlar seldir, leygardagin 2342 og 2. páskadag 2835.
Á Suðuroyarleiðini vóru 980 ferðaseðlar seldir páskadag, og er tað meiri enn undanfarnu páskadagarnar. 816 ferðaseðlar vóru seldir skírisdag, 518 langa Fríggjadag og 948 leygardagin. 2. páskadagur var sum vera man heimferðardagurin stóri, tá 1387 ferðaseðlar vóru seldir.
Á Kallsoyarleiðini fóru 104 ferðafólk um fjørðin langa fríggjadag, munandi meiri enn tey 45 sum ferðaðust skírisdag. Eisini á Svínoyarrutuni var tilboðið væl brúkt, serliga langa fríggjadag.
Á Sandoyarleiðini vóru ferðafólkatølini nakað lægri langa fríggjadag og páskadag enn hinar dagarnar. 278 loystu ferðaseðil um Skopunarfjørð langa fríggjadag og 339 páskadag. Harafturímóti vóru tølini fyri hinar páskadagarnar 652 skírisdag, 718 leygardagin og 866 2. páskadag.
Nólsoyingar tóku eisini væl av tilboðnum. 130 fólk keyptu ferðaseðil langa fríggjadag og 132 páskadag, meðan 127 ferðaðust skírisdag, 241 leygardagin og 192 2. páskadag.
