Niklas heldur jól á fremsta plássi

Føroyski málverjin, Niklas Simonsen, liggur í løtini á fremsta plássi í donsku 1. division við liði sínum, TM Tønder, og málverjin er fegin um gongdina í sínum fyrsta kappingarárið í felagnum.

-Tað hevur gingið sera væl hjá okkum í ár og eg havi eina góða kenslu av mínum persónliga avriki.

-Eg var skaddur teir fyrstu dystirnar, og hin málverjin stóð sera væl, so tá spældi eg ikki nógv. Men síðani havi eg fingið meira og meira spælitíð, sigur málverjin, ið hevur staðið ávikavist 45 og 50 minuttir seinastu tveir dystirnar.

-Tað er eg glaður fyri, leggur hann afturat.

Kvívíkingurin kom heim tveir dagar fyri jól, og tað er við góðum huga at hann er farin í jólafrí.

-Tað er ein deilig kensla at fara halda jól tá ið tú liggur á fyrsta plássinum, so tað skal njótast, sigur málverjin, ið kortini skal venja um jólini. Hetta fyri at leggja lag á til dystirnar aftaná jól, samstundis sum landsliðsvenjingar eisini eru á skránni.

Tað verður ein spennandi seinna helvt av kappingini, ið málverjin í Tønder kemur niður til í januar mánaða.

-Sum tað sær út nú, so flyta vit upp, men vit hava enn 13 harðar dystir fyri framman, so ilt er at siga hvussu tað endar, sigur Niklas Simonsen at enda.

Niklas Simonsen er ein av trimum føroyingum í deildini. Jónas G. Djurhuus spælir við HØJ og Eirikur Simonsen spælir við Frederikshavn FI.

Støðan í deildini er hendan: