Tað gekk ikki væl hjá Neymar og hansara brasilsku liðfeløgum, tá ið teir leiktu ímóti Kolumbia í Copa América í nátt. Kolumbia vann dystin ímóti Brasilia 1-0 við máli, ið varð skorað í fyrra hálvleiki.
Neymar var í sonnum í brennideplinum í dystinum. Millum annað brendi hann ein risastóran málmøguleika, men tað var í yvirtíðini, at bikarið fleyt yvir hjá víðagitna brasiliumanninum. Neymar sparkaði ein bólt eftir kolumbiskum leikara, ið small í jørðina. Hetta spann øði í fleiri av kolumbisku leikarunum, ið skjótt savnaðust rundanum Neymar. Endin var tann, at Neymar skallaði ein leikara hjá Kolumbia, og av hesum fekk hann eitt hart skump frá Carlos Bacca, áleypara hjá Kolumbia. Dómarin tók ta avgerð, at bæði Neymar og Bacca fingu reytt kort.
- Alt gongur mær ímóti. Um ein veikur dómari verður settur at døma slíkar dystir, so er tað slíkt, ið kann henda. Eg verði illur og vreiður, tá ið dómararnir ikki duga at døma, sigur Neymar í viðmerking eftir dystin.
Sum heild er eydnan ikki við Neymar, tá ið Kolumbia er mótstøðuliðið. Tá ið Brasilia leikti ímóti Kolumbia í fjórðingsfinaluni í fjør fekk Neymar álvarsligan ryggskaða, ið gjørdi hann skaddan restina av kappingini.
