Tað verður neyðugt at hækka pensjónsaldurin, tí annars fáa vit ikki tálma útreiðslunum
Tað staðfestir Annka Olsen, landsstýriskvinna í almannamálum.
Nú á miðdegi greiddi hon Løgtinginum frá, at ein bólkur við embætisfólki í Almannamálaráðnum hevur gjørt eina útgreining av pensjónsviðurskiftini.
- Eitt tilmæli hjá bólkinum er, at í fyrstu syftu skal pensjónsaldurin hækka eitt hálvt ár í 2018, so at hann verður 67 og eitt hálvt ár, staðfestir Annika Olsen.
Hon sigur, at hon miðjar eftir at fáa undirtøku í øllum Løgtinginum fyri einari nýggjari pensjónsskipan.
Rodmundur Nielsen heldur, at tað hevur týdning at loysa hetta málið, tí pensjónsnýskipanin er rættiliga grundleggjandi.
Bjørt Samuelsen heldur, at í longdini mugu vit hugsa um, at fólk liva longri og eru arbeiðsfør longri.
- Men fólk, sum eru komin upp í árini, mugu føla seg trygg við, at teirra pensjónsaldur ikki hækkar, tí tað er púra óforsvarligt, heldur hon.
Hendrik Old, sum reisti spurningin í morgun, heldur, at tað er einki so primitivt, sum at hækka pensjónsaldurin við einum skotbrái upp á bara fýra ár.
Annika Olsen er samd í, at tað er neyðugt at fráboða í góðari tí, hvussu pensjónsaldurin verður í framtíðini.
- So má ein politisk semja til at staðfesta um tað skal vera í 2018, í 2023, ella 2028 og tí vónar hon, at alt Løgtingið kann semjast um málið.
